Маск Twitter’да узун постлар яратиш функцияси пайдо бўлишини эълон қилди

Тез орада Twitter ижтимоий тармоғида узун постлар ёзиш имконияти пайдо бўлади. Бу ҳақда ижтимоий тармоқ эгаси Илон Маскка таяниб «ТАСС» хабар бермоқда.

Тез орада узун твитлар ёзиш имконияти пайдо бўлади, — деб ёзди бизнесмен ўзининг Twitter’даги саҳифасида.

Ҳозирда твитнинг максимал узунлиги 280 белгидан иборат. Узоқ вақт давомида ижтимоий тармоқда 140 белгидан иборат хабарларни ёзиш мумкин бўлган. Бироқ 2017 йилда компания раҳбарияти твитдаги ҳарфлар ҳажмини икки баравар оширишга қарор қилганди.

Маск Twitter’ни октябрь ойи охирида 44 миллиард долларга сотиб олди. Шундан сўнг директорлар кенгашини ишдан бўшатиб, ижтимоий тармоқни шахсан ўзи бошқармоқда.

Маск компанияни сотиб олгач, Twitter ходимларининг ярмини, жумладан, юқори бошқарувни ҳам ишдан бўшатди.

Аввалроқ Илон Маск Twitter’нинг 4 400 нафар ходимини огоҳлантиришсиз ишдан бўшатгани аниқлангани ҳақида хабар берилганди.