Навоий вилояти ва Тошкент шаҳрида хорижга ишга жўнатишни ваъда қилган шхслар ушланди. Бу ҳақда Иқтисодий жиноятларга қарши курашиш департаменти ахборот хизмати хабар берди.
Қайд этилишича, Бош прокуратура ҳузуридаги департаментнинг Хатирчи тумани бўлими томонидан ДХХ ва ИИБ ходимлари билан ҳамкорликда тезкор тадбир ўтказилган. Унда фуқаро С.А. фуқаро У.О.нинг ишончига кириб, уни танишлари орқали 5 000 доллар эвазига Америка Қўшма Штатларига юбориш учун виза ва бошқа ҳужжатларни тайёрлаб беришини айтиб, олдиндан 800 долларни олган вақтида ашёвий далиллар билан ушланган.
Шу каби, департаментнинг Тошкент шаҳри бошқармаси ва Сергели тумани бўлими томонидан ДХХ ходимлари билан ҳамкорликда ўтказилган тезкор тадбирда фуқаролар Э.Х. ва Ш.Т. фуқаро Ф.О.нинг ишончига кириб, танишлари орқали унинг номига Хитойдан чақирув таклифномасини юбортириш ва ушбу давлатга кириш визасини тайёрлаб беришлари эвазига 700 доллар ва 300 минг сўмни олган вақтларида ашёвий далиллар билан ушланган.
Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.
Изоҳ (0)