Исроил Америка Қўшма Штатлар (АҚШ) босими остида Украинага қурол етказиб беришни молиялаштиришга рози бўлди. Бу ҳақда Haaretz хабар берди.
Нашрнинг Ғарбдаги манбаларига кўра, Исроил соф гуманитар ёрдамдан қурол етказиб беришга ўтишга рози бўлган. Бунга АҚШ президенти Жо Байден маъмурияти босими сабаб бўлган. Шу тариқа, Исроил Украина учун «стратегик ускуналар» сотиб олишни молиялаштирган.
Исроил Украинага нима етказиб берди?
Исроилда ёки у билан ҳамкорликда ишлаб чиқилган қуролларни НАТО давлатлари орқали етказиб беришга рухсат берилган. Украина Қуролли Кучлари шу тариқа арсеанлини кенгайтириши ва бошқа «стратегик ускуналар»дан фойдаланиши мумкин. Бу қандай «ускуналар» экани ҳақида хабар берилмаган, бироқ Исроил бунга ўз миллий бюджетидан кўп миллион доллар сарфлагани маълум.
Шу билан бирга, бу аввалги ҳукумат томонидан молиялаштирилган бир марталик акция бўлган. Кейинги молиялаштириш ишлари эса Исроил бош вазири Нетаньяхуга боғлиқ. Зеленскийнинг айтишича, Исроил раҳбари қурол-яроғ етказиб бериш масаласини кўриб чиқишга ваъда берган.
Мудофаа соҳасидаги манбаларга кўра, Исроил ҳукумати ҳозирда маҳаллий корхоналарга Эронга қарши туриш учун тезроқ ва яширин учувчисиз учиш қурилмаларини ишлаб чиқиш вазифасини топширган. Дрон ишлаб чиқувчилар учиш қурилмасининг хизмат қилиш муддатини ошириш ва уларнинг радарларда «кўринмас»лигини таъминлаш устида ишламоқда.
Исроил кўп йиллар давомида ўзи ишлаб чиқарган дронлари борлигини яшириб келган ва 2022 йилнинг ёзидагина ҳукумат ушбу мавзуни оммавий ахборот воситаларида ёритишга қўйилган тақиқини бекор қилган. Кўплаб манбаларга кўра, ҳукумат саноат компанияларининг ташқи бозорга чиқиш учун шундай қадам ташлаган.
Ҳозирги вақтда Исроилнинг энг машҳур жанговар учувчисиз учоқлари қаторига Elbit тизимлари томонидан ишлаб чиқарилган Hermes-450 ва Israel Aerospace Industries (IAI) компаниясининг Heron-TP дрони киради.
Изоҳ (0)