Ижтимоий тармоқларда Фарғона вилояти Қўштепа туманидаги 9-сонли мактабгача таълим ташкилотининг тарбияланувчилари орасида овқатдан заҳарланиш ҳолати қайд этилгани тўғрисида хабарлар тарқалди. Вилоят Мактабгача таълим бошқармаси ҳолатга муносабат билдирди.
Қайд этилишича, Қўштепа туманидаги 9-мактабгача таълим муассасасида бугунги кунда 120 нафар болалар тарбияланади. Жорий йилнинг 16 ва 17 ноябрь кунлари туман тиббиёт бирлашмаси юқумли касалликлар бўлимига шу боғчанинг 8 нафар тарбияланувчиси кўнгил айниши, қайт қилиш, ич кетиши ва тана ҳароратининг кўтарилиши шикоятлари билан мурожаат қилган. Шифокорлар кўригидан сўнг уларга ошқозон ичак фаолиятининг бузилиши бирламчи ташхиси қўйилиб, шифохонага ётқизилган.
Суриштирув давомида бир куни олдин болалар боғчасида сут қўшилган сули ёрмаси истеъмол қилиш оқибатида болаларда овқат ҳазм қилиш жараёнининг бузилиши рўй бергани аниқланган.
Шифохонада бемор болаларга малакали тиббий хизмат кўрсатилган, тегишли лаборатория таҳлиллари учун намуналар олинган.
«Ҳозирда ўтказилган муолажалардан кейин болаларнинг аҳволи қониқарли. Уларда овқатдан заҳарланиш аломатлари йўқ», — дейилади хабарда.
Ҳолат юзасидан мутахассислар текширув-суриштирув ишларини ўтказмоқда
Изоҳ (0)