Тошкент шаҳрида республика тармоқлараро саноат ярмаркаси бўлиб ўтмоқда. Кўргазмаларда бутун Ўзбекистондан 5 390 та корхона ўз маҳсулотларини намойиш қиляпти.
Ярмаркада миллий бренд SamAuto ҳам янги авлод автомобиллари билан иштирок этмоқда. Компания томонидан ишлаб чиқарилган юк автомобиллари, автобуслар ва пикаплар анча харидоргир ҳисобланади.
SamAuto дилери сотув менежери Сардорхўжа Мақсудхўжаев «Дарё»га берган интервьюсида автомобилларнинг янги моделлари ва уларнинг имкониятлари ҳақида маълумот берди.
«Кўргазмада SamAuto заводининг 13 та моделдаги автомобиллари, хусусан, 3 та пикап, 1 та автобус ва 9 та юк машиналари намойиш қилинмоқда. Бизнинг асосий мижозлар кичик ва катта корхоналар ҳамда давлат ташкилотлари ҳисобланади.
Айтиш керак, SamAuto томонидан ишлаб чиқарилган Isuzu NMR 77H Light номли янги модель кўпчиликда катта қизиқиш уйғотмоқда.
Бу юк машинасида ҳайдовчи учун максимал даражадаги қулайликлар яратилган. Унинг рул ва ўриндиқларини бир неча шаклда мослаштириш мумкин ва салонида кондиционер ўрнатилган.
Автомобильнинг тўлиқ вазни 3,5 тонна бўлиб, бу шаҳар ичида транспорт ва логистика билан шуғулланадиганлар учун жуда қулай», – деди мутахассис.
Кўргазмада яна бир янги авлод юк автомобили – Isuzu NQR 90L ҳам намойиш қилинмоқда.
«Мазкур модель бутун Ўзбекистонда севилган Isuzu NQR 71PL моделининг ўрнига ишлаб чиқариляпти. Бунинг ўзига хос ютуқ томони эски моделдан бир ярим тоннага тўлиқ вазнининг катталигидир. Шу билан бирга, автомобиль кабинаси кенгайтирилган ва баландроқ қилинган»– дейди Сардорхўжа Мақсудхўжаев.
SamAuto томонидан ишлаб чиқараётган Isuzu NPR82L модели ҳам ўзига хос. Мазкур юк автомобилининг двигатели фақатгина метан газида ишлаши кўплаб ихлосмандлар эътиборини тортади. Аксарият автомобиллари дизелда юришга мослаштирилган SamAuto мижозлар талабига биноан 100 фоиз метан газида ишлайдиган двигателли моделни ишлаб чиқара бошлаган.
Кўргазмада намойиш қилинаётган пикапларга ҳам аҳолининг қизиқиши юқори. Айниқса, янги авлод Isuzu D-MAX русумли пикап қулайлиги ва сифати жиҳатдан ўзига хос. Мазкур автомобиль 163 от кучига эга бўлиб, дизелда ҳаракатланади. Унинг салонида ҳайдовчидан ташқари 4 киши учун ўриндиқлар. Қолаверса, автомобилнинг юк учун мўлжалланган қисмида бир тоннагача юк ташиш имконияти яратилган.
Кўргазмада SamAuto нинг чиқинди ва бензин ташиш ҳамда ўт ўчиришга мўлжалланган махсус автомобиллари ҳамда автобуслари ҳам намойиш қилинмоқда. Компания вакиллари мазкур автоуловларга давлат ташкилотлари томонидан кўпроқ буюртма берилишини айтди.
«Ўзкўргазмамарказ»даги ярмарка 18 ноябрга қадар давом этади. SamAuto стенди биринчи павильон ва Япон боғи томонидан кириш ўртасида жойлашган. Кўргазма меҳмонлари керакли автомобиль моделини жойида сотиб олишлари мумкин.
Маълумот учун, SamAuto 23 йилдан бери автобуслар, юк машиналари ва махсус техникалар ишлаб чиқаради. Компания 2019 йилдан бошлаб Isuzu D-MAX пикапларини ишлаб чиқаришни ҳам йўлга қўйган. Жорий йилдан компания янги 700П автомобиллари авлодини ишлаб чиқаришга ўтди.
Ўзбекистонда SamAuto компаниясининг 34 та дилери фаолият юритмоқда. Компания автомобилларидан харид қилишни истаган мижозлар дилерларга мурожаат қилишлари мумкин.
Телефон: 78 140-80-00
Маълумотлар шериклик ҳуқуқи асосида тайёрланди
Изоҳ (0)