Сурхондарё вилоятининг Термиз шаҳридаги ҳарбий қисмларнинг бирида хизмат қилган 18 ёшли аскар ўлимидан аввал ҳарбий госпиталда эмас, хусусий клиникада операция қилинишининг сабаби очиқланди. Бу ҳақда бугун АОКАда Мудофаа вазирлигининг тиббий таъминот бошқармаси бошлиғи Баҳодир Абдулаҳатов иштирокидаги матбуот анжуманида сўз борди.
Матбуот анжуманида сўз олган «Kun.uz» мухбири Жамшид Ниёзов вазирлик масъулларига юзланиб, аскар йигит ўлимидан аввал ҳарбий госпиталда эмас, хусусий клиникада операция қилинишининг сабаби билан қизиқди.Жарроҳлик амалиёти нега айнан ҳарбий госпиталда эмас, хусусий клиникада амалга оширилди. Ҳозирги матбуот анжуманида Мудофаа вазирлигининг тиббий таъминоти жуда яхши экани, 98 турдаги замонавий тиббиёт ускуналари олиб келингани айтилмоқда. Хўш, унда нега хусусий клиникага эҳтиёж туғилди, — деди Жамшид Ниёзов.
Бизда ишловчи кардиожарроҳ Рустам Ярбеков исмли профессоримиз тўртта клиникада ҳам ишлайди. Шу боис биз ўзимизнинг текширувимиздан сўнг, малакали мутахассисга кўрсатиш учун беморни уларга олиб бордик. Бизнинг дастлабки хулосамиз тасдиқланди. Биз ташхис қўйиб, амалиётга тайёр эдик. Текширувдан сўнг шифокоримиз «Юрагидаги тромб кўчиб кетадиган бўлса, тўсатдан ўлим ҳолати юз бериши мумкин. Шу боис беморни қимирлатишга ҳам рухсат бермайман. Ўзим жарроҳлик амалиётини ўтказиб, тромбини олиб ташлаймиз», деб хулоса қилганини айтди. Шундан сўнг бемор юрагидаги тромб олиб ташланди, — дейди Баҳодир Абдулаҳатов.
Масъулларнинг айтишича, беморда операциядан сўнг, эртаси куни соат 8 ларда юрак тўхтаб қолиши кузатилган.
Беморга кўрсатилган ёрдамлар натижа бермаганлиги сабабли соат 8 ларда беморда биологик ўлим юз берди, — дейди ҳарбий шифокор.
Изоҳ (0)