АҚШнинг Ўзбекистондаги янги тайинланган элчиси Жонатан Хенник 17 ноябрь куни Тошкентдаги элчихонада 3 йиллик дипломатик фаолиятининг йўналишларини муҳокама қилиш учун биринчи матбуот анжуманини ўтказди.
Элчи ўзининг табрик сўзида оммавий ахборот воситалари ҳар қандай демократик давлатнинг ривожланишида муҳим рол ўйнашини айтди.
«Ўзбекистонга қайтиб келганимдан жуда хурсандман, 1994-1996 йиллар оралиғида бу ерда ўзимнинг биринчи дипломатик вазифамни бажарганман. Мамлакат ҳақида жуда яхши хотираларим бор, лекин айтишим керакки, у жуда ўзгарди. Ривожланиш ва ўсиш ноодатий. Ўзбекистон ва муносабатларимиз қанчалик ривожланганини кўришдан мамнунман.
Афсуски, Ўзбекистонда мавжуд маълумотларнинг бир қисми сиз каби мустақил маҳаллий профессионал журналистлардан эмас, балки бошқа мамлакатлардан келганига ишонаман. Уларнинг ҳаммаси ҳам ишончли эмас. Шунинг учун биз элчихона сифатида одамлар Ўзбекистон ҳақида холис маълумотга эга бўлиши учун кўпроқ ҳаракат қилишимиз керак, деб ўйлайман. Умид қиламанки, барчангиз аудиторияга эълон қилаётган маълумотни текширасиз ва бу хабар эканига ишонч ҳосил қилиш учун журналист сифатидаги вазифангизни бажарасиз», — дейди элчи.
Жонатан Хенник сармоявий муҳит ҳақида гапирар экан, Ўзбекистон сайёҳлар учун дунёдаги энг меҳмондўст давлатлардан бири экани, бироқ қонунчиликни тўғри йўлга қўйиш, интеллектуал мулкни ҳимоя қилиш бўйича қўшимча чора-тадбирлар кўриш, коррупцияга қарши курашиш ва давлат улушига эга корхоналар сонини чеклаш зарурлигини айтди. Шунингдек, элчи АҚШнинг Ўзбекистондаги асосий вазифаси иқтисодий тараққиётга кўмаклашиш эканини таъкидлади.
Жонатан Хенник 27 июль куни АҚШнинг Ўзбекистондаги янги элчиси этиб тасдиқланганди. Собиқ элчи Розенблюм АҚШнинг Қозоғистондаги элчиси этиб тайинланган.
Изоҳ (0)