Тошкент вилояти Оҳангарон туманида тадбиркорнинг пулларини қўлга киритган фирибгар аниқланди, деб хабар бермоқда Иқтисодий жиноятларга қарши курашиш департаменти.
Қайд этилишича, Бош прокуратура ҳузуридаги департаментнинг Оҳангарон туман бўлими томонидан тадбиркорлик субъектларининг ҳуқуқларини ҳимоя қилиш юзасидан терговга қадар текширув ўтказилган. Унда фуқаро З.А. Н.Ф. МЧЖ раҳбари Ж.М.нинг ишончига кириб, ҳужжатларни қалбакилаштириш орқали ўзини МЧЖ раҳбари этиб тайинлагани аниқланган. У корхонага қарашли бинони гаровга қўйиш орқали С.С. МЧЖга тижорат банки филиалидан 180 000 доллар кредит ажратилишига эришиб, бунинг эвазига С.С. МЧЖ раҳбари А.К.нинг 20 000 доллар ва 50 миллион сўмини фирибгарлик йўли билан қўлга киритган.
Мазкур ҳолат юзасидан Жиноят кодексининг 168-моддаси (фирибгарлик) ва 228-моддаси (ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) билан жиноят иши қўзғатилган. Ҳозирда тергов ҳаракатлари ўтказилмоқда.
Изоҳ (0)