Истанбулдаги терактни содир этишда гумонланаётган аёл Суриянинг Кобани шаҳрида Курдистон ишчилар партияси (КИП)нинг разведка мактабида ўқиган, у ерда америкалик ҳарбийлар дарс берган. Бу ҳақда Ени Şафак газетаси хабар бермоқда.
«Альбашир сўроқ чоғида КИПнинг Суриядаги филиалига алоқаси борлигини тан олди. Террорчи Айн-ал-Араб (Кобани)даКИП разведка мактабини битирганини айтиб берди, у ерда америкалик аскарлар ҳам таълим берган, у махсус разведка офицери сифатида таҳсил олган», — дейилади хабарда.
Бундан ташқари, гумонланувчи Айн-ал-Арабда ПКК/ЙПГ/SDG ташкилоти раҳбарининг ишончли вакили билан алоқада бўлгани, ундан кўрсатмалар олганини айтган. Ушбу йўл-йўриқларга амал қилиб, қиз бундан тўрт ой аввал Африн-Адлиб орқали Туркияга ноқонуний кириб келган. Полиция аниқлашича, эр-хотиндек кўриниш ва шубҳа уйғотмаслик учун, у Истанбулда ташкилот аъзоси бўлган бир эркак билан бирга ҳаракатланган.
Ўтган ҳафта Истанбул марказидаги Истиқлол пиёдалар кўчасида портлаш юз берган, олти киши ҳалок бўлиб, 81 киши жабрланган эди. Терактни содир этишда гумонланиб, Аҳлам Альбашир қўлга олинган, у КИП билан алоқаси борлигига иқрор бўлган. ИИВ маълумотларига кўра, терактни содир этиш ҳақидаги буйруқ Суриянинг чегара яқинидаги Кобани шаҳридан келиб тушган.
Тинтув чоғида қизнинг ёнидан паспорт, йирик миқдорда пул, рақамли қурилмалар ва теракт уюштириш бўйича материаллар топилган. Шунингдек, 21 та манзилда тинтув олиб борилди, жами 50 киши қўлга олинди.
Альбаширга уни Грецияга жўнатиб юборишга ваъда беришган, бироқ полиция қўлидаги маълумотларга қараганда, теракт ташкилотчилари уни Истанбулнинг ўзидаёқ йўқ қилмоқчи бўлишган.
Аввалроқ Туркия ички ишлар вазири Сулаймон Сойлу Истанбулдаги портлаш муносабати билан АҚШ томонидан билдирилган ҳамдардликни Анқара қабул қилишдан бош тортишини маълум қилган эди.
«Биз Америка элчихонасидан билдирилган таъзияни қабул қилмаймиз. Биз ҳеч кимга сотқинлик қилмаяпмиз, лекин бизга қилинаётган сотқинликка ортиқ чидаб туролмаймиз», — деди у ва Туркия ҳукумати «ҳужум қаерда мувофиқлаштирилганидан хабардор бўлганини» ҳам таъкидлади.
«Менимча бугун АҚШ томонидан эълон қилинган ҳамдардликни қотилнинг воқеа жойига биринчилардан бўлиб етиб келишига қиёслаш керак. Ва бу таъзияга муносабат жуда аниқ бўлади. Буни яқин келажакда кўрасиз», — деган у.
Ички ишлар вазири портлаш ортида Курдистон ишчилар партияси тарафдорлари турганини маълум қилди. «Бизнинг ҳисоб-китобларимизга кўра, буйруқ Кобанидан (Сурия шимолидаги шаҳар) келиб тушган, ҳужум ижрочиси эса Африндан (Сурия шимоли-ғарбидаги шаҳар)… Терговчилар қўлидаги далиллар портлашни ‘Демократик иттифоқ’ партияси (Курдистон ишчилар партиясининг Суриядаги жанговар қаноти) уюштирганини кўрсатмоқда», — деди Сойлу.
Изоҳ (0)