Украинанинг Киев шаҳри, Сум, Черкасс, Одесса, Львов, Волин, Житомир ва Харьков вилоятларига ракета зарбалари берилмоқда. Бу ҳақда Meduza нашри хабар берди.
Маълум қилинишича, шаҳар ва вилоятда портлаш овозлари эшитилмоқда. Киев мери Виталий Кличко ракеталар Печерский туманидаги иккита турар-жой биносига тушганини тасдиқлаган. Гувоҳларнинг сўзларига кўра, беш қаватли бинода ёнғин чиққан. Киев шаҳар ҳарбий бошқармаси шаҳар узра тўртта ракета уриб туширилганини маълум қилди. Аҳоли бошпаналарда қолишга чақирилган.
Киев вилояти маъмурияти раҳбари Олексей Кулеба ҳаво ҳужумидан мудофаа тизими минтақада бир нечта ракеталарни уриб туширганини таъкидлади. Украина телеграм-каналлари Полтава, Черкасс ва Запорожье вилоятлари устидан ракеталар учаётгани ҳақида ёзмоқда. Бутун Украина бўйлаб ҳаво ҳужумидан огоҳлантириш тизими ишга тушган. Бу Киевнинг икки ҳафта ичида биринчи марта ўққа тутилиши ҳисобланади.
Таъкидланишича, Львов ва Житомирнинг бир қисми электрсиз қолди, Харьковда метро вақтинчалик тўхтатилди, шаҳарнинг бир қанча туманларида эса электр энергияси узилди, Киев шаҳрида ҳам фавқулодда электр узатиш тўхтади.
Изоҳ (0)