Кўп томонлама институтлар, шу жумладан, БМТ ҳам сайёрадаги хаос (тартибсизлик, алғов-далғовлик) эплай олмади ва муаммоларни ҳал қила олмади. Бу ҳақда «Катта йигирматалик» саммитида Ҳиндистон бош вазири Нарендра Моди айтиб ўтди. Унинг гапларини The Indian Express газетаси келтирди.
Моди дунё бугунги кунда тўқнаш келаётган муаммолар қаторида иқлим ўзгариши, коронавирус пандемияси, Украинадаги воқеалар ва етказиб беришлар глобал занжирининг узилишини тилга олди. Унинг сўзларига кўра, БМТ бу муаммоларга ечим топа олмаган.
«Биз барчамиз тегишли ислоҳотларни ўтказа олмадик. Шу сабабли бугунги кунда дунёнинг G20 дан умидлари катта. Гуруҳимизнинг долзарблиги янада каттароқ аҳамият касб этди», — деди Моди.
Моди Украинадаги низога алоҳида тўхталиб ўтди. У дипломатия ёрдамида ўт очишни тўхтатиш ва зиддиятга ечим топишга чақирди.
G20 саммити Балида бугун, 15 ноябрь куни бошланиб, эртага ҳам давом этади. Financial Times ёзишича, саммит якунида қабул қилинадиган қўшма баёнотда гуруҳнинг аксарият мамлакатлари Россиянинг Украинадаги хатти-ҳаракатларини қатъиян қоралаши кутилмоқда. Делегациялар аъзолари баёнот лойиҳасини аллақачон келишиб олган, бироқ иштирокчи мамлакатлар етакчилари уни имзолаганича йўқ.
Изоҳ (0)