Хитой ракетаси космосда портлаб кетди

АҚШ космик кучлари Хитойнинг «Long March-6А» ракетаси коинотда портлаб кетганини маълум қилди. Бу ҳақда Forbes хабар берди.

Ракета 50 га яқин бўлакларга бўлинди. Ҳодиса тахминан 500 километр баландликда, Халқаро космик станция (ХСК) орбитасидан бир оз юқорида юз берди. Айрим Starlink сунъий йўлдошлари ҳам шу баландликда жойлашган. Ракета парчалари Ернинг паст орбитасида қўшимча космик чиқиндиларга айланди. Астроном Сис Бассанинг фикрича, ракета корпуси «Юнхай-3» сунъий йўлдоши ракетадан ажралиб чиққанидан кўп ўтмай коинотда парчаланиб кетди.

11 ноябрь куни ҳам Хитойнинг «Long March-6А» енгил тоифали ракетаси Ерни кузатиш учун мўлжалланган «Юнхай-3» янги сунъий йўлдошини коинотга олиб чиқди. Аммо 12 ноябрь куни коинотда нимадир юз берди ва ҳодиса оқибатида ракета портлади ҳамда парчаланиб кетди.

«Ракета парвозини бир неча соат давомида кузатиш шуни кўрсатадики, ёқилғи сизиб чиққан бўлиши мумкин. Ракетанинг иккинчи босқичи ўнлаб бўлакларга бўлинди, улар тез айланиб, осмонда аниқ ёрқин излар қолдирди», — дейди Басса.

Астрономнинг сўзларига кўра, Хитой ракетасининг бу бўлаклари бир неча йил давомида Ерга қайтади. Эҳтимол, ракетанинг қолдиқлари атмосферада ёниб кетади. Аммо яна бир муаммо бо. Ракета парчалари ХКС билан тахминан бир хил орбитада учади, бу эса орбитал станция хавфсизлигига таҳдид солиши мумкин.

Аввалроқ Жанубий Корея ўзининг биринчи космик ракетасини космосга учирганди. Бироқ ракета сунъий йўлдош макетини орбитага олиб чиқа олмаганди.