Россия президенти Владимир Путин фуқароликдан маҳрум қилиш эҳтимоли тўғрисидаги қонун лойиҳасига ўзгартириш киритди. Унга кўра, армия ҳақидаги сохта хабарлар, уни обрўсизлантириш, номақбул ташкилотларда қатнашиш, ҳудудий яхлитликни бузишга чақириқлар учун фуқароликдан маҳрум қилиш таклиф қилинмоқда.
Ҳужжатга кўра, фуқароликдан маҳрум қилиш тўғрисидаги қарор «Россия Федерацияси хавфсизлигига таҳдид соладиган ҳаракатлар содир этилган ва бундай ҳаракатлар факти аниқланган саналардан қатъи назар» қабул қилиниши мумкин. Бундай ҳаракатлар фактини текшириш Федерал хавфсизлик хизмати зиммасига юкланади.
Россия Давлат Думаси фуқароликдан маҳрум қилиш тўғрисидаги қонун лойиҳасини апрель ойи бошида биринчи ўқишда қабул қилган эди. Ҳужжатнинг дастлабки нусхасида давлатга қарши оғир жиноятлар, террорчилик фаолияти, наркотик моддалар савдоси ва ҳужжатларни қалбакилаштириш учун фуқароликдан маҳрум этиш таклиф қилинган. Фуқароликни тугатиш тўғрисидаги қарорлар Россия президенти томонидан мажбурий тасдиқланиши керак.
Бундан ташқари, қонун лойиҳаси Россия фуқаролигини олиш учун ариза берувчиларнинг 20 дан ортиқ тоифаларига қўйиладиган талаблар сонини қисқартиради. Ҳужжат, шунингдек, президентнинг соддалаштирилган фуқароликни олиш ҳуқуқига эга бўлган шахслар тоифаларини белгилаш бўйича ваколатларини кенгайтиради.
Изоҳ (0)