Невада штатидаги ғалабадан сўнг демократлар АҚШ Сенати устидан назорат ўрнатди. Вакиллар палатасида республикачилар устунлик қилмоқда

АҚШнинг Невада штатида Демократик партия вакили Кетрин Кортес-Масто сенаторлик сайловида ғалаба қозонди. Бу демократларга АҚШ Сенатида 50 ўрин ва Конгресс юқори палатаси устидан назоратни беради.

Овозларнинг 95 фоиздан ортиғи санаб бўлингач, Кортес-Масто хоним 48,7 фоиз овозга эга бўлди ва Невада штатининг республикачи собиқ бош прокурори Адам Лаксалтни 0,5 фоизга ортда қолдирди. Edison Research, NBC, CNN, ABC ва бошқа оммавий ахборот воситалари ва таҳлил марказлари демократнинг ғалабаси тайин экани ҳақида хабар қилмоқда.

Шундан келиб чиқилса, декабрь ойида сайловнинг иккинчи босқичи бўлиб ўтадиган Жоржияда республикачилар ғалаба қозонган тақдирда ҳам партия Сенат устидан назоратни қўлга кирита олмайди. Овозлар тенг бўлган тақдирда, ҳал қилувчи овоз демократлар вакили бўлган вице-президент Камала Харрисда қолади.

Республикачилар партияси АҚШ Вакиллар палатаси устидан назоратни қўлга киритиши мумкин. АҚШ матбуотига кўра, ҳозирча қуйи палатага 211 нафар республикачи ва 206 нафар демократлар кирди. Назоратни қўлга киритиш учун 218 та ўринни эгаллаш керак.