Самарқандда Ўзбекистон—Венгрия бизнес-форумида бош вазир ўринбосари — инвестициялар ва ташқи савдо вазири Жамшид Хўжаев инвесторлар нима учун Ўзбекистонни танлаши кераклигини айтди.
Унинг сўзларига кўра, биринчи навбатда инвестициялар учун қулай муҳит мавжуд. Инвесторлар ҳуқуқлари қонун билан ҳимояланиши бўйича амалий тизим яратилди. Натижада 2017 йилдан бошлаб (3,3 млрд доллар) тўғридан-тўғри хорижий инвестициялар ҳажми 2,5 баробарга ошди (8,6 млрд доллар).
Қарийб 8 мингта товар турларига импорт божлари камайтирилди. Бизнесга оид ҳар хил турдаги 70 та лицензия ва 34 та рухсатномалар берилиши бекор қилинди. Шунингдек, янги бизнес субъектларини рўйхатдан ўтказиш тартиби соддалаштирилди. Ер участкалари онлайн савдолар орқали тақдим этилмоқда.
Иккинчидан, иқтисодиётни барқарор ривожлантириш сиёсати. Ўзбекистон иқтисодиётининг йиллик ўртача ўсиши 5 фоизни, саноат соҳалари 8 фоизни ташкил этмоқда. 2021 йилда бу кўрсаткич 7 фоиздан ортди. Экспорт ҳажмлари 1,5 баробарга ошди.
Ўзбекистон аҳолиси 72 миллион кишилик Марказий Осиё ва 300 миллион кишилик Мустақил давлатлар ҳамдўстлиги бозорларига чиқиш имкониятига эга.
Шу билан бирга, GSP+ кенгайтирилган преференциялар тизими Европа бозорларига 6 мингдан ортиқ маҳаллий маҳсулотлар турларини имтиёзли шартларда экспорт қилиш имкониятини яратди. Шу туфайли Европа мамлакатларига қилинган экспортимиз хажми бу йилнинг ўзида 70 фоизга ошди.
Учинчидан, Ўзбекистон иқтидорли, ёш ва юқори салоҳиятга эга кадрларга бой. Аҳолининг 60 фоизидан ортиғини 30 ёшгача бўлган ёшлар ташқил этади. Улар билимга интилувчан, турли касб-ҳунарларни ўзлаштиришга иштиёқи баланд ҳамда чет тилларида сўзлашадиган олий маълумотга эга фуқаролар ва ёшлардир.
Тўртинчидан, Ўзбекистонда табиий бойликларнинг улкан захиралари мавжуд. Олтин ресурс базаси бўйича дунёда 2-ўринни, мис бўйича — 7, волфрам бўйича —8, кумуш бўйича — 9, уран бўйича 12 — ўринни, табиий газ ишлаб чиқариш бўйича эса 16-ўринни эгаллайди.
Булар нафақат тоғ-кончилик, балки, электротехника, рангли металлургия ва машинасозлик каби соҳаларда янги технологиялар ёрдамида ишлаб чиқарилган маҳсулотларни учинчи мамлакатларга чиқиш учун улкан замин яратади.
Бешинчидан, тадбиркорлик субъектлари ишлаб чиқаришлари узлуксизлигини таъминлаш мақсадида барча зарур инфратузилмалар яратилмоқда. Жойларда саноат, қишлоқ хўжалиги, фармацевтика ва туризмга ихтисослашган 22 та махсус иқтисодий зоналар барпо этилди. Ушбу зоналар автомобиль йўллари, электр энергия, табиий газ, ичимлик суви ва канализация, интернет тармоғи каби барча муҳандислик коммуникация инфратузилмалари билан таъминланган.
Шунингдек, мазкур зоналарда фаолият юритаётган тадбиркорларга 10 йилгача мол-мулк, ер, сув ресурсларидан ва фойда солиқларидан озод қилинади.
Олтинчидан, ишлаб чиқарувчиларни қўллаб-қувватлаш мақсадида уларга молиявий ёрдам ва субсидиялар тақдим этилмоқда. Маҳаллий ишлаб чиқарувчилар ўз маҳсулотларини экспорт қилишини рағбатлантириш учун транспорт ҳаражатларининг 70 фоизгача қоплаб бериш механизми яратилган
Шунингдек, инвесторлар билан қўшма лойиҳаларни биргаликда молиялаштириш учун Инвестициялар жамғармасини таъсис этилган.
Еттинчидан, Ўзбекистон йирик транспорт йўлаклари кесишувида жойлашган бўлиб, Ғарб билан Шарқ, Шимол билан Жануб мамлакатлари бозорлари ўртасида кўприк вазифасини, муҳим логистика майдони вазифасини ҳам бажара олади.
Мавзуга доир: Ўзбекистоннинг Жаҳон савдо ташкилотига қўшилиш жараёни жадаллаштирилади
Изоҳ (0)