Херсон вилоятидаги Россия қўшинлари қўмондони Сергей Суровикин Россия Федерацияси Мудофаа вазири Сергей Шойгуга Херсон вилоятининг ўнг қирғоқ қисмини тарк этишни таклиф қилди, деб ёзади Meduza.
Шойгу Суровикиннинг таклифига рози бўлди.
Суровикиннинг айтишича, ҳозирги шароитда Херсон ва унга яқин аҳоли пунктларини тўлиқ таъминлаб бўлмайди. «Вазиятни баҳолаб, Днепрнинг чап қирғоғи бўйлаб мудофаа қилишни таклиф қиламан", — деди у. Суровикин бу қарорни «қийин» деб атади, аммо бу одамлар ҳаётини сақлаб қолишини айтди.
«Биз учун россиялик ҳарбий хизматчиларнинг ҳаёти ва соғлиғи доимо устувор ҳисобланади. Биз тинч аҳолига таҳдидни ҳам ҳисобга олишимиз керак. Қўшинларни олиб чиқишни давом эттиринг ва Днепр дарёси орқали техника, қурол ва ходимларни хавфсиз ўтказиш учун барча чораларни кўринг», — деди Шойгу.
Россия Херсонни март ойининг бошида, Украина ҳудудига бостириб киргандан кейинги дастлабки кунларда эгаллаб олган эди. Бу шаҳар уруш бошидан бери рус армияси томонидан босиб олинган ягона вилоят марказига айланди.
Ёзда узоқ масофали артиллерия тизимларини олган Украина Херсон вилоятидаги кўприкларни ўққа тута бошлади. Бу Херсоннинг ўзи жойлашган Херсон вилоятидаги Днепрнинг ўнг қирғоғидаги рус қўшинлари гуруҳини таъминлашни қийинлаштирди.
Сентябрь ойининг охирида Россия Украинанинг бошқа босиб олинган ҳудудлари билан бир қаторда Херсон вилоятини ҳам аннексия қилди. Октябрь ойи ўрталарида, Украина Қуролли Кучларининг қарши ҳужумини кутаётган бир пайтда, Херсон вилоятининг Россия томонидан тайинланган ҳукумати тинч аҳолини Днепрнинг ўнг қирғоғидан «эвакуация қилиш» ҳақида эълон қилди.
7 ноябрь куни эса Кремлда Херсондан воз кечиш эҳтимоли ҳақида гапирилган эди.
Изоҳ (0)