Xerson viloyatidagi Rossiya qo‘shinlari qo‘mondoni Sergey Surovikin Rossiya Federatsiyasi Mudofaa vaziri Sergey Shoyguga Xerson viloyatining o‘ng qirg‘oq qismini tark etishni taklif qildi, deb yozadi Meduza.

Shoygu Surovikinning taklifiga rozi bo‘ldi.

Surovikinning aytishicha, hozirgi sharoitda Xerson va unga yaqin aholi punktlarini to‘liq ta’minlab bo‘lmaydi. “Vaziyatni baholab, Dneprning chap qirg‘og‘i bo‘ylab mudofaa qilishni taklif qilaman", — dedi u. Surovikin bu qarorni “qiyin” deb atadi, ammo bu odamlar hayotini saqlab qolishini aytdi.

“Biz uchun rossiyalik harbiy xizmatchilarning hayoti va sog‘lig‘i doimo ustuvor hisoblanadi. Biz tinch aholiga tahdidni ham hisobga olishimiz kerak. Qo‘shinlarni olib chiqishni davom ettiring va Dnepr daryosi orqali texnika, qurol va xodimlarni xavfsiz o‘tkazish uchun barcha choralarni ko‘ring”, — dedi Shoygu.

Rossiya Xersonni mart oyining boshida, Ukraina hududiga bostirib kirgandan keyingi dastlabki kunlarda egallab olgan edi. Bu shahar urush boshidan beri rus armiyasi tomonidan bosib olingan yagona viloyat markaziga aylandi.

Yozda uzoq masofali artilleriya tizimlarini olgan Ukraina Xerson viloyatidagi ko‘priklarni o‘qqa tuta boshladi. Bu Xersonning o‘zi joylashgan Xerson viloyatidagi Dneprning o‘ng qirg‘og'idagi rus qo‘shinlari guruhini ta’minlashni qiyinlashtirdi.

Sentabr oyining oxirida Rossiya Ukrainaning boshqa bosib olingan hududlari bilan bir qatorda Xerson viloyatini ham anneksiya qildi. Oktabr oyi o‘rtalarida, Ukraina Qurolli Kuchlarining qarshi hujumini kutayotgan bir paytda, Xerson viloyatining Rossiya tomonidan tayinlangan hukumati tinch aholini Dneprning o‘ng qirg‘og‘idan “evakuatsiya qilish” haqida e’lon qildi.

7-noyabr kuni esa Kremlda Xersondan voz kechish ehtimoli haqida gapirilgan edi.