Қозоғистоннинг Манғистау вилоятидаги Балиқ назорати бошқармаси ходимлари Каспий денгизи қирғоғида 130 дан ортиқ ўлик тюленларни топди. Бу ҳақда Қозоғистон Экология, геология ва табиий ресурслар вазирлигининг Балиқчилик хўжалиги қўмитаси матбуот хизмати хабар берди.
Тюленларнинг ўлими сабабларини аниқлаш учун воқеа жойида ҳукумат вакиллари, экологлар, Гидробиология ва экология институти, шунингдек, Каспий денгизи тюленларини ўрганиш ва реабилитация маркази ходимларидан иборат комиссия иш олиб бормоқда.
«Айни дамда илмий муассасалар ва ташкилотларнинг, шунингдек ветеринария хизматларининг ходимлари ҳайвонлар нобуд бўлган жойда гидробиологик, гидрокимёвий таҳлиллар учун сув ва тупроқдан тегишли намуналар олмоқда. Шунингдек, гистологик ва токсикологик лаборатория тадқиқотлари учун тюленларнинг тўқималари ва ички органларидан ҳам намуна олинмоқда», — деб тушунтирди матбуот хизмати.
Қозоғистон президенти Қосим-Жўмарт Тўқаев Манғистау вилоятига ташрифи чоғида Каспий денгизини ўрганиш бўйича давлат илмий институтини ташкил этиш тарафдори эканлигини маълум қилган. Шунингдек, тегишли идораларга Каспий денгизи тюленлари популяциясини сақлаб қолиш бўйича ишларни тезлаштириш, Каспий денгизи акваторияси ва қирғоқларини мунтазам ўрганишни ташкил этиш бўйича топшириқлар берган.
Изоҳ (0)