Россия президенти Владимир Путин Донбассга «мавриди келганида» боради, аммо ҳозирча бундай ташриф режада йўқ, деди Россия раҳбарининг матбуот котиби Дмитрий Песков.
«Ҳозирча қандайдир аниқ режалар йўқ, лекин ишончим комил, Путин Донбассга боради, албатта. У ер Россия ҳудудлари, ва Путин у ерга боради», — деди Песков.
Донецк ва Луганск халқ республикалари, шунингдек, Херсон ва Запорожье вилоятлари 30 сентябрь куни Россия таркибига кирди. Шу куни Владимир Путин ушбу ҳудудлар вақтинчалик раҳбарлари Денис Пушилин, Леонид Пасечник, Владимир Салдо ва Евгений Балиций билан уларнинг янги субъектлар ҳуқуқлари остида Россияга қўшилиши ҳақидаги шартномаларни имзолади. Шартномалар парламент томонидан ратификация қилинди, шундан кейин 5 октябрь куни Путин бу шартномаларни ратификация қилиш тўғрисидаги қонунларни имзолади.
Ҳудудлар 23—27 сентябрь кунлари бўлиб ўтган референдумлар натижалари бўйича Россия таркибига кирди. ЛХРда сайловчиларнинг 98,42 фоизи, ДХРда — 99,23 фоизи, Херсон вилоятида — 87,05 фоизи, Запорожьеда — 93,11 фоизи Россияга қўшилишни ёқлаб овоз берди.
Владимир Путин Россиянинг янги ҳудудларига ҳозирча боргани йўқ. Донбасс, Херсон ва Запорожьега ташриф буюришга улгурган юқори мансабли амалдорлар орасида бош вазир ўринбосари Марат Сайфуллин, президент маъмурияти раҳбари биринчи ўринбосари Сергей Кириенко, Давлат думаси спикери Вячеслав Володин, Хавфсизлик кенгаши раиси ўринбосари Дмитрий Медведев бор.
Песковнинг ўзи эса, Кириенко маълум қилишича, бир кун аввал, 7 ноябрь куни Луганскка ташриф буюрган, у ерда матбуот хизматлари ва ОАВлар учун тренинг ўтказган.
Изоҳ (0)