Биткоин 18 минг долларгача қулади. Бу 2020 йил ноябрь ойидан бери энг паст кўрсаткич

Биткоин бугун, 9 ноябрь куни 18 минг долларгача арзонлади. Бу ҳақда CoinDesk портали маълумотларида келтирилади. 

Дунёдаги энг йирик криптовалюта 8 ноябрь охирида 20,5 минг долларгача кўтарилган эди. Шундан кейин унинг қийматидаги кескин пасайиш кузатилди. 

Тошкент вақти билан 9 ноябрь куни соат 08:14 да биткоиннинг қиймати 18 минг долларни ташкил қилган. Бу 2020 йилнинг ноябрь ойидан бери энг қуйи кўрсаткичдир. 

Соат 11:00 га келиб криптовалютанинг қиймати 18 381 доллар бўлиб турибди. 

Биткоин июнь ва июль ойларида АҚШда асосий ставканинг ошиши, инфляция ва криптовалюталар билан боғлиқ муаммолар туфайли 20 минг доллардан пастга туша бошлаган эди.

Биткоиннинг бозор қиймати август ўрталарида 500 млрд доллардан юқори бўлиб турганди. Айни пайтда бу кўрсаткич 352 млрд долларга тенг. 

2021 йил ноябрь ойида криптовалюта нархи 69 минг долларгача кўтарилган эди.