«Манчестер Юнайтед»ни мағлуб этган Унаи Эмери АПЛда Моуриньонинг кўрсаткичини қайд этди

«Астон Вилла» Премер Лига 15-тури доирасида кечган баҳсда «Манчестер Юнайтед»ни 3:1 ҳисобида мағлубиятга учратди.

Бу «Астон Вилла» бош мураббийи Унаи Эмери учун жамоа бошқарувидаги дебют ўйин эди. Эмери АПЛ клубидаги дебют ўйинида «Манчестер Юнайтед» устидан ғалаба қозонган тарихдаги тўртинчи мураббийга айланди.

Унга қадар «Шеффилд» билан Дейв Бассетт (1992 йил), «Челси» билан Жозе Моуриньо (2004) ва «Вест Ҳэм» билан Алан Кербишли (2006) ушбу натижага эришганди.

Эмери 24 октябрь куни «Астон Вилла» бош мураббийи этиб тайинланганди. Испаниялик мутахассис 1 ноябрга келиб ишлаш ҳуқуқини олди ва ўша кундан расман ишга киришди.

Аввалроқ «Астон Вилла» 1995 йилнинг августидан кейин илк бор «Манчестер Юнайтед»га қарши уй ўйинида ғалаба қозонгани хабар қилинганди.