«Қўчқоров масъулиятли вазиятни расво қилганига жуда ачиндим» — фаоллар вазирнинг халқаро форумдаги саволга аниқ жавоб бера олмагани ҳақида

Ижтимоий тармоқларда Самарқанддаги иқтисодий форумда хорижлик журналистнинг Ўзбекистон нимаси билан чет эллик инвесторларни ўзига жалб қилиши мумкинлиги ҳақидаги саволига бош вазир ўринбосари, иқтисодий тараққиёт ва камбағалликни қисқартириш вазири Жамшид Қўчқоровнинг берган ноаниқ жавоби муҳокамаларга сабаб бўлди.

Тадбиркор Дилшод Одилов Facebook’даги саҳифасида Жамшид Қўчқоровнинг Bloomberg мухбири Райан Чилкот саволига ҳазиломуз тарзда берган жавобига фикр билдирди.

Халқаро форумда «нима учун Ўзбекистонга инвестиция қилишим керак?», деб савол берилиши инвесторларга давлатимизни реклама қилиб олиш учун жуда гўзал имконият. Аслида, бу савол берилмаса ҳам, гапни айлантириб келиб, инвесторларнинг хаёлига келиши мумкин бўлган шу саволга жавоб бериб олишга ҳаракат қилиш керак эди.

Аммо бутун бошли давлатнинг номидан ўтирган вазирнинг бу саволни берган модераторга гўёки «узкий круг» чойхонада ўтиргандек ҳиринг-ҳиринг қилиб, «бунақа қийин савол берсанг, сени бошқа чақирмаймиз, ундан кўра ёшимни сўра...» каби ноўрин ҳазиллар қилишини мутлақо ҳазм қила олмадим.

Бирорта инвестор «буларнинг вазири ҳазилни ёриб юборар экан, шу сабабли 100 миллион доллар пул киритиб, шу давлатда бизнес бошлайман», дедимикан?

Қўчқоровнинг шундай масъулиятли вазиятдан усталик билан фойдаланиш ўрнига ҳиринг-ҳиринг қилиб, вазиятни расво қилганига бир ватандош сифатида жуда ачиндим.

Вазиятларни исроф қилишга ҳеч кимнинг ҳаққи йўқ. Ошналар билан чойхонада ўтириш билан халқаро тадбирда давлат номидан иштирок этишнинг фарқини тушунмайдиган одам бундай тадбирларга бормаслиги керак.

Дилшод Одилов, тадбиркор.

Яна бир форум ўтди. «Ҳали ҳам Ўзбекистонга сармоя киритишга иккиланиб турган инвесторга мамлакат 5 йилда қандай ўзгариши ҳақида нима деган бўлардингиз?», деган саволга бош вазир ўринбосари Қўчқоровдан чиройлироқ жавоб кутгандим. Чунки айнан шу савол берилиши мумкин бўлган саволлар рўйхатида биринчи қаторда турадиганларидан эди. Тайёрланиш керак эди. Балки беш йилдан кейин инвестор ортида шахслар эмас, қонунлар, мустақил суд туради, миллиард сарфлаб қилаётган бу каби «паловфорум»ларимизга ҳожат қолмайди. Аввалги форумимиздан кейин бундай ижобий натижаларга эришдик, келгуси режаларимиз эса шундай, каби жавоб кутган мендадир айб.

Лекин бир нарсани тушуниш керак. Биз каби ривожланишга ҳаракат қилаётган учинчи дунё давлатлари талайгина. Тендер кетяпти, ўртоқ Қўчқоров ва бошқа каттаконлар. Қоидани биласиз. Унда энг яхши таклиф берган ютади. Ўзингизни унутиб, жозибадорлик ҳақида кўпроқ ўйланг, илтимос.

Зафарбек Солижонов, блогер.

Ўзаро яқин таниш ва бир-бирига ҳадди сиғадиганлар ўртасида сўз ўйинлари нормал ҳолат. Кимдир тушунади, кимгадир эриш туюлади. Форум якунида Райан Чилкот ва Жамшид Қўчқоров мулоқотидаги ҳазил аралаш савол ва жавобдаги луқмалар шу жумладан, — дея қайд этган у.