«Депутатлик шаънига доғ туширди». Мактаб ўқувчисини калтаклаган қамашилик сўконғич депутат депутатлар сафидан чиқарилди

Қашқадарё вилоятининг Қамаши туманида мактаб ўқувчисини ўласи қилиб калтаклаган ва журналистни ҳақорат қилган депутат депутатлар сафидан чиқарилди. Бу ҳақда ЎзЛиДеПнинг расмий каналида маълум қилинди.

Маълум қилинишича, кеча, 5 ноябрь куни Қамаши туманида Тадбиркорлар ва ишбилармонлар ҳаракати — Ўзбекистон Либерал-демократик партияси туман Кенгаши ҳамда Халқ депутатлари туман кенгашига ЎзЛиДеПдан сайланган депутатларнинг қўшма мажлиси бўлиб ўтган.

Қўшма йиғилишда партия аъзоси, халқ депутатлари туман кенгаши депутати Нуртоев Панжи Норбоевичнинг партия аъзоси, қолаверса, туман кенгаши депутати номига доғ туширувчи ножўя хатти-ҳаракатлари атрофлича муҳокама қилинди. Йиғилиш иштирокчилари П.Нуртоевни кўп йиллардан бери туманда фермерлик ҳаракати ривожига ҳисса қўйиб келаётган шахс, «Мирзадала Норбой» фермер хўжалиги раҳбари сифатида туманда яхши билишларини таъкидлаб ўтишди.

Мазкур йўналишдаги фаоллигини инобатга олган ҳолда, партия туман кенгаши ўз вақтида унинг номзодини дастлаб партия аъзолигига, кейинчалик халқ депутатлари туман кенгаши депутатлигига илгари сурганлиги айтиб ўтилди. Лекин, буларнинг барчаси шу кунларда у томонидан содир этилган салбий ҳолатларни оқламаслиги кўрсатиб ўтилди. Ҳуқуқий давлатда ҳеч кимга ҳар қандай ҳолатда ҳам жисмоний куч ишлатиш, ўзбошимчалик билан, қонунни қўпол тарзда бузиб, жазо қўллаш ваколати берилмаганлиги таъкидланди, — дейилади ЎзЛиДеП ахборот хизмати маълумотида.

Таъкидланишича, депутатлар Панжи Нуртоевнинг мактаб ўқувчисини аёвсиз калтакланганини ҳеч нарса билан оқлаб бўлмаслигини айтиб ўтган.

Қолаверса, мазкур воқеага аниқлик киритиш мақсадида унга мурожаат қилган журналистнинг саволларига берган бемаъни жавоблари, хусусан, ишлатилган ҳақоратли сўзлари нафақат унинг ўзи, оиласига, балки у аъзо бўлган партиянинг обрўсига, депутатлик шаънига жиддий доғ туширди. Йиғилиш қатнашчилари Нуртоевнинг қонунга зид ушбу қилмишларини ҳеч қандай важ билан асослашнинг имкони йўқлиги, йўл қўйилган мазкур хатти-ҳаракати билан у партия Устави талабларини қўпол равишда бузганлиги, оқибатда бундан кейин унинг партия сафида қолиши асло мумкин эмаслигига урғу беришди, — дейилади масъуллар изоҳида.

Қўшимча қилинишича, ЎзЛиДеП Қамаши туман Кенгаши ўз ваколатларидан келиб чиқиб, депутатнинг амалдаги қонунларга зид ҳаракатлари билан партия шаънига доғ туширгани учун ЎзЛиДеП Уставининг 3.4. бандига асосан уни партия сафидан чиқариш масаласини овозга қўйган. Таклиф мажлис иштирокчилари томонидан қабул қилинган.

Шунингдек, партия туман Кенгаши ҳамда депутатлик корпуси иштирокида бўлиб ўтган мажлисда Панжи Нуртоевнинг бу қилмишлари депутатлик одобининг умумеътироф этилган нормаларини қўпол равишда бузувчи ва депутатлик мақомига доғ туширувчи ҳолат сифатида баҳоланиб, Ўзбекистон Республикасининг «Халқ депутатлари маҳаллий кенгаши депутатини, Ўзбекистон Республикаси Олий Мажлисининг Қонунчилик палатаси депутатини ва Сенати аъзосини чақириб олиш тўғрисида»ги Қонунининг 2-моддаси билан сиёсий партияларга берилган ваколатга асосланган ҳолда уни депутатликдан чақириб олиш борасида Халқ депутатлик Қамаши туман кенгашига тавсиянома киритиш масаласи ҳам овозга қўйилди ва иштирокчилар томонидан маъқулланди, — дейилади партия марказий Кенгаши ахборотида.

Мажлисда қабул қилинган қарорларни партия Устави ва тегишли қонунчиликда белгиланган талаблар асосида тасдиқлаш учун ЎзЛиДеП вилоят Кенгашига киритиш борасида келишиб олинган. Панжи Нуртоев томонидан йўл қўйилган бу каби ноқонуний ҳаракатлар келгусида рўй бермаслиги учун мазкур ҳолатларни партия ва депутатлик йиғилишларида кенг муҳокама қилиш тавсия этилган.