Туркия Финляндия ва Швециянинг НАТОга киришини қўллаб-қувватламаяпти

Туркия Финляндия ва Швециянинг Шимолий Атлантика иттифоқига (НАТО) киришини қўллаб-қувватламаяпти, деб хабар берди Deutsche Welle.

НАТО бош котиби Йенс Столтенберг Туркия ташқи ишлар вазири Мевлут Чавушўғли билан ўтказган қўшма матбуот анжуманида Швеция ва Финляндия тезроқ НАТОга қабул қилиниши кераклигини, улар Туркиянинг талабларини аллақачон бажарганини айтди.

«Финляндия ва Швецияни НАТОнинг тўлақонли аъзоси сифатида кутиб олиш вақти келди, бу альянснинг ўзини ҳам мустаҳкамлайди ва унга аъзо барча мамлакатлар хавфсизлигини оширади», — деди Столтенберг.

НАТО бош котиби, шунингдек, 4 ноябрь, жума куни Туркия президенти Ражаб Тоййиб Эрдўғон билан икки давлатнинг альянсга қўшилиши масаласини муҳокама қилишини айтди.

Айни пайтда, Мевлут Чавушўғли Йенс Столтенбергга эътироз билдириб, Туркия ва Швеция ўртасидаги муносабатларда ўсиш борлигига қарамай, Хелсинки ва Стокгольмнинг альянсга яқин орада кириши ҳақида гапириш имконсиз эканини айтди. Унга кўра, Финляндия ва Швеция Анқара қўйган талабларнинг барчасини ҳали бажармаган.

Туркиянинг асосий шартлари, хусусан, Курдистон ишчилар партияси аъзоларини ва 2016 йилги давлат тўнтаришига уринишда гумон қилинганларни Анқарага экстрадиция қилиш. Аввалроқ Туркия адлия вазири Бекир Боздаг Хелсинки ва Стокгольмни террорчиларни экстрадиция қилишдан бош тортишда айблаган эди. Унинг айтишича, Финляндия ва Швеция Туркия томони юборган экстрадиция рўйхатидан бирорта террорчини ҳалигача Анқарага топширгани йўқ.