3 ноябрь куни Бишкек шаҳрида Ўзбекистон ва Қирғизистон ўртасида сиёсий маслаҳатлашувларнинг навбатдаги давраси бўлиб ўтди. Бу ҳақда Ташқи ишлар вазирлиги хабар қилди.
Қайд этилишича, икки мамлакат ташқи ишлар идоралари раҳбарлари Владимир Норов ва Жеенбек Кулубаэв Ўзбекистон—Қирғизистон ўртасидаги икки ва кўп томонлама ҳамкорликнинг долзарб масалаларини муҳокама қилган.
Жумладан, икки давлат ўртасида давлат чегарасини делимитация қилиш масалалари бўйича фикр алмашилган.
Тенглик, ўзаро манфаат ва яхши қўшничилик тамойиллари асосида давлат чегарасини кесиб ўтиш линиясини ҳуқуқий расмийлаштиришни якунлаш икки мамлакат ва бутун Марказий Осиё манфаатларига жавоб бериши таъкидланган.
Делегациялар ўзаро савдо ҳажмини ошириш ва унинг номенклатурасини кенгайтириш, икки томонлама ҳамкорлик механизмлари фаолиятини фаоллаштириш, бизнес субъэктлари ва минтақалар ўртасидаги алоқаларни кенгайтириш чораларини кўришга келишиб олган.
Биргаликда йирик инфратузилма ва энергетика лойиҳаларини амалга ошириш, жумладан, «Хитой—Қирғизистон—Ўзбекистон» темир йўлини қуриш масалалари алоҳида муҳокама қилинган.
Маданий-гуманитар йўналишда қатор қўшма тадбирларни ўтказиш юзасидан фикр алмашилган.
Изоҳ (0)