Ўзбекистон иқтисодий жиҳатдан Марказий Осиёда энг тез ўсаётган мамлакат. Бу ҳақда Жаҳон банки вице президенти Анна Берде Самарқандда бўлиб ўтаётган форумда маълум қилди, дея хабар бермоқда «Дарё» мухбири.
Анна Берденинг айтишича, мамлакат иқтисодий ўсишини янада жадаллаштириш учун бир қатор ислоҳотларни амалга ошириш муҳим.
«Ҳозир дунё иқтисодиётида жуда кўп ноаниқликлар мавжуд. Бир неча инқирозлар пайдо бўляпти. Биз Марказий Осиёда 2022 йилда қандай ўзгаришлар бўлишини ўрганиб чиқдик. Бутун минтақа бўйича иқтисодий ўсиш 0,2 фоиз бўлаётганини кузатяпмиз. Минтақада маҳсулотларни экспорт қилиш анча жадал. Хусусан, Россия фуқароларни кўчиб келиши ва капиталларни олиб келиши таъсирида иқтисодий ўсишни кўрсатяпти. Аммо молиявий шароитларни бундан ҳам жиддий бўлишини кутяпмиз.
Ўзбекистон — Марказий Осиёда энг тез ўсаётган мамлакат. Унинг иқтисодиёти йилига 4,9 фоизга ўсмоқда. Республика 2026 йилгача ўрта даромадли мамлакатлар сафига кириш ҳаракатида.
Ўзбекистонда Солиқ кодекси бюджетни анча шаффофлаштирди. Молиявий қадамлар давлат қарзини камайтиришга олиб келди. Ижтимоий ҳимоя тизими яратилгач, мамлакатда ижтимоий ёрдам қабул қиладиган оилалар 2 бараварга ортгани маълум бўлди. Бу йили биз Ўзбекистон аҳолисининг 5 фоиздан кам қисми глобал даражадаги чегарадан пастдан тепага кўтариляпти.
Лекин биз бўшашишимиз керак эмас. Ишимиз ҳали жуда кўп. Хусусий секторни қўллаб-қувватлаш лозим. Савдо харажатларини камайтириш зарур. Бунда нархларни либераллаштириш лозим. Таълим сифати ва соғлиқни сақлашга ҳам жуда кучли эътибор қаратиш керак. Биз Ўзбекистонга ёрдам беришга сизларни ишонтирмоқчиман».
Форумда Осиё тараққиёт банки вице президенти Шихин Чен сўзга чиқиб, яқинда Ўзбекистонга иқтисодиётни ва аҳолининг ижтимоий ҳимояга муҳтож қатламларини қўллаб-қувватлаш учун 500 миллион доллар миқдорида молиявий кўмак ажратилишини айтди.
«Бу пуллар ижтимоий ҳимоя, соғлиқни сақлаш ва бошқа соҳаларга йўналтирилади», – деди у.
Ишонч билдирилишича, 2026 йилга бориб мамлакатда камбағалликни 2 баравар камайтириш мақсади амалга ошади.
Аввалроқ Самарқандда Ўзбекистон иқтисодий форуми бошлангани хабар қилинганди.
Изоҳ (0)