Коронавирусдан кейин Марказий Осиё минтақаси қайта тикланмоқда, бироқ олдинда қатор муаммо ва тўсиқлар мавжуд. Бу ҳақда Самарқандда ўтказилаётган иқтисодий форумда Халқаро валюта жамғармасининг яқин шарқ ва Марказий Осиё департаменти директори Жиҳад Азур айтиб ўтди, дея хабар бермоқда «Дарё» мухбири.
Жиҳад Азурнинг таъкидлашича, глобал иқтисодий ўсиш пасайиб бораётган вазиятда Марказий Осиё ўрта истиқболли стратегияларни аниқлаб олиши зарур.
Ноаниқлик даврини бошдан кечиряпмиз. Лекин барибир шундай вазиятда ҳам аниқ фактларга юзланиш керак. Марказий Осиё минтақаси қайта тикланяпти. Минтақа коронавирусдан кейин тез оёққа туриб олди. 2022 йил бошидан инфляция кўтарилиши муҳим иқтисодий хатарларга олиб келди. Фоиз ставкалари ошди. Қолаверса, Украинадаги уруш анча тўсиқлар яратди. Шунинг учун, ташхисларимиз кўп яхши ваъдалар бермаяпти. Бу йил биз минтақада давом этадиган иқтисодий ўсишни кутяпмиз. Экспорт ва импорт ҳажми ошмоқда.Жиҳад Азурнинг қўшимча қилишича, Марказий Осиёда кейинги 5 йилдаги иқтисодий ўсиш охирги 7 йилга қараганда камроқ бўлади.Пул ўтказмалари ва интеллектуал капиталнинг кириб келиши иқтисодий ҳолатни яхшиламоқда. Шокларни енгишга ёрдам беряпти. Кейинги бир неча йиллар давомида қатор муаммо ва тўсиқлар давом этади. Жумладан, фоизга босим бўлиб, савдо ҳажми камаймоқда. Глобал иқтисодий ўсиш ҳам пасаймоқда.
Барча хавфларни тўғри баҳолаб, эришилган позицияларни ҳимоя қилиб бориш керак. Биринчи навбатда инфляция ва паст даромадли аҳолини ҳимоя қилиш лозим. Чунки озиқ-овқат нархининг ўсиши уларга кучли таъсир қилади. Бу барча минтақадаги мамлакатлардан ўрта истиқболли стратегияларни аниқлаб олишни талаб қилади.
«Минтақа тезроқ иқтисодий ўсишга ҳаракат қилиши лозим. Бизларда бир неча таҳдидли ҳудудлар бор. Улар – яқин шарқ ва яқин Осиё коридорларидир. Хавфларни ривожланаётган давлатлар ривожланган давлатлардан олдинроқ ва тез аниқлаб, бартараф этишга интилаётгани яхши ютуқлардан бири», – деди мутахассис.
Аввалроқ дунёда нархлар ва доллар курси ошиши кутилаётгани хабар қилинганди.
Изоҳ (0)