Қозоғистоннинг Қарағанди вилояти Шахтинск шаҳрида жойлашган «АрселорМиттал Темиртау» конида газ отилиб чиқиши юз берди. Оқибатда тўрт нафар ишчи ҳалок бўлди, деб ёзади Tengrinews Фавқулодда вазиятлар вазирлиги расмий вакили Рустам Иманкуловга таяниб. Кейинроқ бешинчи ишчининг жасади топилгани маълум қилинди. Шу тариқа, қурбонлар сони беш кишига етди.
Дастлабки маълумотларга кўра, 3 ноябрь куни соат тахминан 3 ларда «АрселорМиттал Темиртау» АЖ конида газ-дренаж қудуқларини бурғулаш чоғида тўсатдан газ отилиб чиқиши содир бўлди, бу 5 ишчининг ўлимига олиб келди. Тўрт киши касалхонага ётқизилган.
Шунингдек, 106 нафар ишчи эвакуация қилинган.
Қарағанди вилояти полицияси кондаги фавқулодда ҳолат юзасидан суриштирув бошлади, жиноят иши очилди. Воқеа жойида тергов-тезкор гуруҳлар ишламоқда.
Шунингдек, конга вилоят ҳокими Женис Касимбек, шаҳар раҳбари, компания раҳбарияти ҳам етиб борган. Қутқарув хизмати иш олиб бормоқда.
Ҳодиса юз берган вақтда конда 106 ишчи бўлган, шуларнинг 101 нафари ер юзасига чиққан, 5 киши эса (улар конга тушириш ва чиқариш механизмини бошқарувчи ишчилар бўлган) кон лифтларини ишлатиб туриш учун қолган. Уларнинг тўрт нафари тириклик белгиларисиз топилган, яна бир киши бедарак йўқолган. Кейинроқ унинг жасади ҳам топилган.
Изоҳ (0)