Маск Twitter ходимларининг ярмига яқинини ишдан бўшатмоқчи — Bloomberg

Bloomberg маълумотларига кўра, Илон Маск Twitter ходимларининг ярмига яқинини ишдан бўшатишни режалаштирмоқда.

Агентлик манбаларига кўра, Twitter’нинг 7,5 минг ходимидан 3,7 мингга яқини ишдан бўшатилади. Компания, шунингдек, штатда қолган ходимларга масофадан ишлашни тақиқлайди. Bloomberg суҳбатдошларининг фикрича, бундай чоралар харажатларни камайтиришга қаратилган.

Аввалроқ Маск Twitter директорлар кенгашини ишдан бўшатиб, уни ўзи бошқаришини айтганди.

Маълумот учун, тадбиркор 28 октябрь куни Twitter’ни 44 миллиард долларга сотиб олиш бўйича келишувга эришган. Шундан сўнг у Twitter’нинг бош қароргоҳига ташриф буюрган видеосини эълон қилган.

Компанияни сотиб олгач, Маск Twitter’да «кенг фикр-мулоҳазага эга бўлган» одамлар иштирок этадиган «цензура кенгаши»ни эълон қилди. Бундан ташқари, New York Times ёзганидек, бизнесмен компания ходимларини ишдан бўшатишни бошлашни буюрди.

Шунингдек, Илон Маск Twitter’нинг ишдан бўшатилган уч нафар раҳбарига салкам 200 миллион доллар тўлаши кераклиги ҳақида хабар берилганди.