Сурхондарёда 428 млн сўм кредит маблағини талон-торож қилган раҳбар ушланди

Сурхондарё вилояти Бойсун туманида тикувчиликни ривожлантириш ва чорва молларини етказиб бериш учун ажратилган кредит маблағларини ўзлаштириш ҳолатлари аниқланди. Бу ҳақда Иқтисодий жиноятларга қарши курашиш департаменти хабар қилди.

Қайд этилишича, Бош прокуратура ҳузуридаги департаментнинг Бойсун туман бўлими томонидан терговга қадар текширув ўтказилган. Унда «У.» кичик корхонаси раҳбари Н.А. ҳудудий тижорат банки филиалидан тикувчиликни ривожлантириш учун тикув машинаси, асбоб-ускуна ва хом ашёлар сотиб олиш учун ажратилган кредит маблағини «Б.Т.» кичик корхонасига ўтказиш орқали бошқа мақсадларда сарфлаб юборгани аниқланган. У жами 428,4 миллион сўмни ўзлаштириш йўли билан талон-торож қилган.

Шунингдек, Бойсун туман бўлими томонидан ўтказилган яна бир терговга қадар текширувда фуқаро Ў.I. ва «М.Ў.» фермер хўжалиги раҳбари Ў.М. 6 нафар фуқаронинг хабардорлигисиз таъминотчи корхоналар ҳисоб рақамига 174 миллион сўм кредит маблағини ўтказгани аниқланган. Улар фуқароларга чорва молларни олиб бермасдан, ўзгалар мулкини фирибгарлик йўли билан қўлга киритган.

Мазкур ҳолатлар юзасидан Жиноят кодексининг тегишли моддалари билан жиноят ишлари қўзғатилган. Ҳозирда тергов ҳаракатлари ўтказилмоқда.