Тошкент шаҳрида ўқитувчилар учун 1 миллиард 5 миллион сўмга форма харид қилингани юзасидан шаҳар ҳокимининг ўринбосари Дурдона Раҳимова «Дарё»га изоҳ берди.
Тошкент шаҳар ҳокимлиги октябрь ойида ўқитувчилар учун 1 минг 200 та комплект ягона форма харид қилган. Бу учун бюджетдан 1 миллирад 5 миллион сўм ажратилган. Битта комплект учун тендирда 1 миллион 250 минг сўмдан 1 миллион 500 минг сўмгача кўрсатилган. Форма ичига юбка, кўйлак, галстук, жакет ва кофта киради.
Тошкент шаҳар ҳокимининг ёшлар сиёсати, ижтимоий ривожлантириш ва маънавий-маърифий ишлар бўйича ўринбосари Дурдона Раҳимованинг айтишича, ушбу ҳаракат ўқитувчиларни ижтимоий ҳимоя қилиш йўлида қилинган.
«Мазкур ташаббусдан мақсад — ҳар бир касб эгаларида бўлгани каби шарафли касб эгалари бўлмиш ўқитувчиларимизга ўз формалари билан ажралиб туриши ва оз бўлса-да ижтимоий кўмак бериш. Шунингдек, уларга нисбатан ёш авлодда ҳурмат ва эҳтиром кўрсатиш фазилатини уйғотмоқчимиз», — деди ҳоким ўринбосари.
Дурдона Раҳимованинг айтишича, форма учун белгиланган нархлар бозордагидан қиммат эмас.
«Агар маҳаллий ишлаб чиқарувчилардан бозор нархида сотиб оладиган бўлсак айнан шу нархдан юқори бўлиши табиий. Биз формаларнинг сифатига ҳам алоҳида талабларимизни қўйганмиз. Формалар ўқитувчиларга текинга, Тошкент шаҳар ҳокимлигининг маҳаллий бюджетдан ортириб бажарилган қисмидан харид қилинмоқда», — деди у.
Қўшимча қилинишича, 5 минг 200 нафар ўқитувчига мазкур турдаги формаларни бериш режалаштирилган бўлиб, баҳорда 4 мингта форма берилган ва кузда 1 минг 200 нафар муаллимга форма берилмоқда.
Изоҳ (0)