Туркиянинг Cимтас Стеел компанияси Ўзбекистонда шамол генераторлари учун миноралар ишлаб чиқаришни йўлга қўйишни режалаштирмоқда.
Инвестициялар ва ташқи савдо вазирлиги маълумотига кўра, ушбу компания қайта тикланадиган энергетика соҳасида фойдаланадиган электр станциялари учун дунёдаги энг йирик ускуналар етказиб берувчилардан бири ва Туркиядаги шамол генераторлари учун миноралар ишлаб чиқаришни йўлга қўйган биринчи компания ҳисобланади.
Инвестициялар ва ташқи савдо вазирининг биринчи ўринбосари Нозим Холмуродов ва ушбу компания делегацияси билан учрашубда компаниянинг Ўзбекистонда шамол электр станциялари учун миноралар ишлаб чиқариш лойиҳасини амалга ошириш бўйича таклифининг ташкилий жиҳатлари кўриб чиқилган.
Cимтас Стеел вакиллари Ўзбекистонда жорий қилинган инвестициявий муҳит, хорижий инвесторлар учун тақдим этилаётган имтиёз ва преференциялар билан танишишгач, шамол турбиналари учун ускуналар етказиб бериш ва миноралар ишлаб чиқаришни маҳаллийлаштиришни компаниянинг Ўзбекистондаги фаолиятининг энг мақбул ва самарали йўналишлари сифатида белгилаб олди.
Музокаралар якунида компания вакиллари кейинчалик маҳсулотларни Марказий Осиё мамлакатларига экспорт қилиш истиқболларини ҳисобга олган ҳолда Тошкент вилоятида шамол турбиналари учун миноралар ишлаб чиқариш лойиҳасини амалга оширишга қизиқиш билдирдилар. Ўз навбатида, Вазирлик раҳбарияти компаниянинг инвестиция лойиҳасини амалга оширишда ёрдам беришга тайёрлигини билдирди.
Изоҳ (0)