Польша ўзининг биринчи атом электр станцияси қурилиши учун Американинг Westinghouse электротехника комапниясини танлади, дея маълум қилди АҚШ энергетика вазири Женнифер Гренхолм.
«Янгилик билан бўлишмоқчиман: Польша бош вазири Матеуш Моравецкий атом соҳасидаги 40 миллиард долларлик лойиҳасининг биринчи қисмини амалга ошириш учун АҚШ ҳукуматини ва Westinghouse компаниясини танлади», — деди АҚШ вазири Вашингтонда бўлиб ўтган МАГАТЭ конференциясида.
Польша ҳудудида АЭС қурилиши ҳақидаги маълумотни мамлакат бош вазири Матеуш Моравецкийнинг ўзи ҳам Twitter орқали тасдиқлади.
«Кучли Польша-Америка альянси қўшма ташаббуслар муваффақиятига кафиллик беради. Биз Westinghouse’нинг ишончли ва хавфсиз технологияси бўйича ядро лойиҳаси амалга оширилишини тасдиқлаймиз», — деб ёзди у.
Вазир қўшимча қилишича, Польша Вазирлар кенгашининг ушбу масала бўйича расмий қарори 2 ноябрь, чоршанба куни қабул қилинади.
Westinghouse Жанубий Кореянинг Korea Hydro Nuclear Power давлат компанияси билан рақобат қилган. Шунингдек, Варшава лойиҳа бўйича Франция компаниялари билан ҳам музокаралар олиб борган.
Польша ядро энергетикасини ривожлантириш дастурига мувофиқ, ўзининг биринчи АЭСини PWR туридаги реакторлар билан жиҳозламоқчи. 2033 йилда биринчи блок ишга туширилиши кутилмоқда, у Гданьск соҳилбўйи яқинида жойлашади. Кейинги блоклар ҳар икки-уч йилда бирма-бир ишга туширилади, бутун ядро дастури доирасида эса қуввати 9 ГВт гача бўлган олтита блокни қуриш кўзда тутилган.
2021 йилда Франция, Польша, Венгрия, Чехия, Руминия, Словакия ва Словения атом энергетикасини ёқлаб чиққан эди. Ушбу мамлакатлар раҳбарлари Европа комиссиясига хат ёзиб, атом энергетикаси иқлим сиёсатида, шу жумладан, барқарор молиялаштириш қоидаларида бошқа паст углеродли технологиялар билан бир қаторда туриши керак, деган фикрни билдирган.
Изоҳ (0)