Япония ҳукумати АҚШга мурожаат қилиб, унга Америкада ишлаб чиқарилган Tomahawk қанотли ракеталарини сотишни сўради. Бу ҳақда Yomiuri газетаси хабар бермоқда.
Вашингтон бу ташаббусга ижобий муносабат билдирган, ракеталарни етказиб бериш бўйича музокаралар эса аллақачон якунловчи босқичга ўтган.
Битта ракета нархи 1,3 миллион долларгача етиши мумкин. Уларнинг учиш масофаси қарийб 1,2 минг километрга тенг.
Ўз арсеналига Tomahawk ракеталарини қўшиш орқали Япония тийиб туриш салоҳиятини мустаҳкамлашга ва тегишли хавф юзага келган тақдирда, потенциал душман базаларига зарбалар бериш воситасига эга бўлишга умид қилмоқда.
КХДР Японияга қарата баллистик ракета учирди
Эслатиб ўтамиз, КХДР 4 октябрь куни эрталаб Японияга қарата баллистик ракета учирди, у Хоккайдо префектураси устидан учиб ўтиб, Тинч океанига қулади. Шундан кейин Япония ҳукумати ҳаво тревогасини эълон қилиб, осмондан ракета бўлаклари тушиши эҳтимоли ҳақида огоҳлантирди. Сўнгги марта КХДР ракетаси Япония ҳудудидан учиб ўтиши 5 йил аввал содир бўлганди. КХДР томонидан учирилган ракета кузатувлар тарихида биринчи марта 4600 км масофани босиб ўтган.Кўп ўтмай, АҚШ Ҳарбий-денгиз кучлари ва Япониянинг қуруқликдаги ўзини-ўзи мудофаа қилиш кучлари HIMARS баравар ўт очувчи реактив тизимлари ёрдамида қўшма машғулот ўтказди.
Япония ҳарбий имкониятларини ўзгартирмоқчи
Июнь ўрталарида Япония ҳукумати халқаро майдондаги вазият туфайли яқин беш йил ичида мамлакатнинг ҳарбий имкониятларини кескин оширишни мақсад қилгани маълум бўлганди. Бу ҳақда Япония бош вазири «Шангри-Ла» мулоқоти номини олган хавфсизлик бўйича Осиё саммитида маълум қилган.«Кисида хавфсизлик соҳасидаги вазият тобора кескинлашиб бораётганини қайд этди, Япония кейинги беш йил ичида ҳарбий имкониялатларини оширади, бироқ бетарафлик позициясини ҳам сақлаб туради», – дея хабар қилган Kyodo.
Ундан аввал ҳам, май бошида Япония мудофаа вазири Нобуо Киси Пентагон раҳбари Ллойд Остин билан учрашувда Токионинг ҳарбий потенциалини яхшилашни режалаштираётганини айтганди.
Изоҳ (0)