Нозим Сафари тротуар плиткаларини ғоваклисига алмаштириш орқали йўллардаги оқава сувларни камайтириш мумкинлигини айтди

«Дарё» интернет-нашри ҳамда Тошкент шаҳри ҳокимлиги қошидаги Жамоатчилик кенгаши ҳамкорлигида ташкил этилган «Маҳалла. Муаммо. Мулоҳаза» лойиҳасининг 4-сони меҳмони мустақил журналист, публицист, блогер Нозим Сафари бўлди. Кўрсатувнинг бу галги мавзуси — Тошкентнинг нон оқизадиган ариқлари қани?

Нозим Сафари кўрсатув давомида йўлларда оқава сувлар тўпланиб қолмаслиги бўйича бир нечта ечимлар билан бўлишди. Қайд этилишича, ғовакли плиткалар ёрдамида сув бевосита ернинг пастига кетиши мумкин.

«Кўп харажат кетмайдиган ёки йилларга чўзиладиган комплекс ечимларни талаб қилмайдиган бошқа йўллар ҳам бор. Масалан, оддий ечимлардан бири: тротуар плиткаларини ўзгартириш. Бизда катта-катта, темир бетонли материалдан тайёрланган плиткалар ишлатилади. Ўшани кичкина, ғовакли кўринишдагисига алмаштирилса агар, ҳеч бўлмаганда, ўша тротуар устига тушаётган сув ер пастига тушиб кетади ва буни ер шимиб олади. Агар шунақа плиткалардан фойдалансак, Тошкентнинг анча қисмида биз сувларни табиий равишда ернинг таг қисмига жўнатиб юборамиз.

Ёки яна бир усули бор, жуда ҳам замонавий ечим: ғовакли асфальтдан фойдаланиш. У сувни ютиб юборади ўзига. Тўғри, унга етиб боришимизга ҳали анча бор, лекин мана шу плиткаларни ўзгартириш ҳам яхшигина фойда олиб келади», — дейди блогер.