«Дарё» интернет-нашри ҳамда Тошкент шаҳри ҳокимлиги қошидаги Жамоатчилик кенгаши ҳамкорлигида ташкил этилган «Маҳалла. Муаммо. Мулоҳаза» лойиҳасининг 4-сони меҳмони мустақил журналист, публицист, блогер Нозим Сафари бўлди. Кўрсатувнинг бу галги мавзуси — Тошкентнинг нон оқизадиган ариқлари қани?
Кўрсатув меҳмонининг таъкидлашича, фақатгина дренаж тизимининг ўзи йўлларда тўпланиб қолаётган сув муаммосини ҳал қилиб беролмайди. Оқова сувларни ўзига тортиб, ер қарига сингдириб юборадиган табиий, тупроқли ерлар ҳам керак.
Агар қайсидир шаҳарда сувни чиқариб юбориш билан боғлиқ муаммолар кузатилаётган бўлса, бу, биринчи навбатда, шаҳарда ер кам қолаётганининг аломати ҳисобланади. Чунки асфальтли, бетонлаштирилган, сунъий қаттиқ қопламали йўллар қурилаётгани сувни чиқариб, асосий қисмини ютиб юборадиган оддий қум, тупроқли ерлар кам қолаётганидан далолат. Мана шу асосий урғу бўлиши керак бизда. Дренаж тизими деганда фақат коллекторда оқизиб юбориладиган сувларни инобатга оламиз. Лекин катта сув тошқинлари кузатилганда дренаж тизимлари яхши ишлайдиган ҳудудларда ҳам муаммо юзага чиқиб келяпти, — дейди у.Нозим Сафари сувни чиқариб юборадиган канализация йўллари жуда катта босимга учраётганини айтиб, ҳамма сувни канализацияга оқизмасдан, бир қисмини қумли ерларга йўналтириш катта эффект беришини билдирди.
Барибир муаммолар кўп, аммо мана шундай фундаментал, моҳиятан муҳим бўлган нарсалардан бошлаш керак. Тошкентда ерни кўпайтириш масаласини ўйлаб кўрсак яхши бўларди. Ҳатто катта ташкилотларнинг ҳовлисига кирсангиз ҳам бирор жойда тупроқ кўрмайсиз, оддий ер кўрмайсиз. Ҳаммаёқ бетонлаштирилган. Тувакда гул ўсиб турар, аммо табиий ер йўқ, — дейди журналист.
Кўрсатувни тўлиқ тарзда «Дарё»нинг YouTube’даги саҳифаси орқали томоша қилиш мумкин.
Изоҳ (0)