Telegram’даги «Компроматузб» каналида Наманган вилояти ҳокими Шавкат Абдураззоқовнинг хизмат автомобилида ЙТҲ содир этилгани, йўловчи уриб юборилгани хабар берилди. «Дарё» хабарга аниқлик киритиш мақсадида вилоят ИИБ, ЙҲХБ ахборот хизмати раҳбари Эркин Сатторов билан боғланди.
Ҳа, воқеа содир бўлган. Вилоят ҳокимлиги ахборот хизмати воқеа ҳақида батафсил маълумот беришини билдирган. Шу боис биз бу ҳақда ахборот бермадик. Ҳозир ҳам сизга воқеа тафсилотларини очиқлай олмайман, — дейди «Дарё» билан мулоқотда бўлган вилоят Йўл ҳаракати хавфсизлиги бошқармаси ахборот хизмати раҳбари Эркин Сатторов.Масъул ЙТҲ бугун содир этилганини инкор этиб, воқеа икки-уч кун аввал бўлганини билдирди. Шунингдек, Эркин Сатторов журналистнинг «ЙТҲда одам ўлими қайд этилмаганми?», деган саволига, «йўқ» дея жавоб берди.
«Дарё»нинг мазкур масала юзасидан қилинган сўровига жавоб берган Шавкат Абдураззоқовнинг матбуот котиби Фарҳод Мамадалиев ЙТҲда йўловчига зарар етмаганини, айни пайтда у соппа-соғ эканини билдирди.
Ҳолатдан батафсил хабарим йўқ. Воқеа вилоятнинг Уйчи тумани йўлида содир бўлган. Менга берилган маълумотга кўра, автомобиль йўловчига секин урилган. Шу заҳоти ҳайдовчи уни шифохонага олиб борган ва тўлиқ текширувдан ўтказган. Йўловчида ҳеч қандай синиш, чиқиш каби жароҳатлар кузатилмаган. Айни пайтда у соппа-соғ, — дейди вилоят ҳокимининг матбуот котиби.Масъул журналистнинг йўловчининг ёши, воқеа содир бўлган кун ҳамда вақт борасидаги қўшимча саволларига жавобан батафсил маълумот беришини билдирди.
Изоҳ (0)