Тошкентда аҳолини арзон озиқ-овқат маҳсулотлари билан таъминлаш масалалари кўриб чиқилди

Инвестициялар ва ташқи савдо вазири Жамшид Хўжаев 25 октябрь куни Тошкентда бўлиб ўтган БМТнинг Қишлоқ хўжалигини ривожлантириш халқаро жамғармасининг Йиллик йиғилиши доирасида ўтказилган Озиқ-овқат тизимларини трансформациялаш бўйича минтақавий халқаро конференциянинг очилиш маросимида иштирок этди.

Вазирлик матбуот хизмати маълумотига кўра, у ўзининг кириш сўзида коронавирус пандемияси даврида озиқ-овқат таъминоти занжирларининг узилиши билан боғлиқ вазият кичик уй хўжаликларидан тортиб йирик қишлоқ хўжалиги ва озиқ-овқат комплекслари ҳамда етказиб берувчи корхоналаргача бўлган барча даражадаги озиқ-овқат тизимларининг аҳамияти ва ўзаро боғлиқлигини яна бир бор кўрсатганини таъкидлади.

Қишлоқ хўжалигини трансформациялаш шароитларида аҳолининг кенг қатламларини арзон озиқ-овқат маҳсулотлари билан таъминлаш зарурлиги таъкидланди. Ушбу муаммонинг ечимларидан бири сифатида маҳсулот таннархи занжирида содир бўлаётган ўзгаришларни таҳлил қилувчи, жараёнлар ва маҳсулот таннархининг ишлаб чиқарувчилар, етказиб берувчилар ва истеъмолчиларга таъсирини ўлчайдиган, шунингдек, нархлар ва бозорга етказиб бериладиган товарлар ҳажмларининг барқарорлигини таъминлаш бўйича тегишли тезкор чораларни кўришга имкон берувчи тизимларни жорий қилишга қаратилган лойиҳаларга инвестицияларни кенгайтириш таклиф этилди.

Барқарор озиқ-овқат тизимларини шакллантириш мақсадида самарали инвестиция лойиҳаларини амалга ошириш учун минтақа ҳукуматлари ҳамда халқаро молия институтлари ва донор ташкилотлар даражасида ўзаро ҳамкорликни таъминлаш учун амалий чоралар кўриш муҳимлиги қайд этилди.

Конференция доирасида, шунингдек, «Европа ва Марказий Осиё минтақасида барқарор озиқ-овқат тизимларини ўзгартиришни молиялаштиришнинг асосий манбаларини аниқлаш» ҳамда «Озиқ-овқат тизимини трансформациялашини тезлаштирувчи воситаси сифатида хусусий ва иқлим молиялаштирилишининг роли» каби мавзуларни қамраб олган шўъба мунозаралари ўтказилди.

Тадбир якунида иштирокчилар Марказий Осиёда Озиқ-овқат тизимини жадал трансформациялаш тўғрисида аҳдлашув декларациясини қабул қилди.