БМТ Тараққиёт дастури «Ўзгидромет» билан ҳамкорликда Фарғона водийсидаги танланган пилот (миллий) дарёлар ҳавзасида иқлим ўзгаришининг ҳозирги ҳолати ва одамлар ҳаётига потенциал таъсирини яхшироқ тушуниш мақсадида ҳавзаларни режалаштириш бўйича иккинчи семинар ўтказди.
Қайд этилишича, тадбир 2022 йил 29—30 август кунлари бўлиб ўтган биринчи семинарнинг давоми. Унда 40 нафар давлат мутасаддилари, ҳавза ташкилотлари, маҳаллий ва миллий сув мутахассислари ва экспертлари билан биргаликда Фарғона водийсидаги 3 та пилот (миллий) дарё ҳавзаси танлаб олинди. Бу сафарги мақсад — дарё ҳавзасининг учта пилот дарёлар режасига киритиш учун мавжуд иқлим билан боғлиқ хавфларни муҳокама қилиш, иқлим ўзгариши билан боғлиқ хавфларни бартараф этиш бўйича кейинги қўшма ҳаракатлар режасини ишлаб чиқиш.
Тадбир БМТ Тараққиёт дастурининг «Ўзгидромет»нинг Европа Иттифоқи томонидан молиялаштирилган «Марказий Осиёда иқлим ўзгариши ва барқарорлик» лойиҳаси доирасида ташкил этилди. Лойиҳа Фарғона водийси, Қирғизистон Республикаси, Тожикистон Республикаси ва Ўзбекистон Республикаси ўртасидаги трансчегаравий зонада барқарорлик ва иқлим ўзгаришига чидамлиликни қўллаб-қувватлашга қаратилган. Лойиҳанинг асосий режаларидан бири Фарғона водийсининг миллий қисмида сув ресурсларидан барқарор фойдаланишни яхшилаш мақсадида дарёлар ҳавзасини бошқариш режаларини такомиллаштиришдир.
Иштирокчилар Майлисой, Шоҳимардонсой ва Подшоота дарёларининг танланган ҳавзаларида мавжуд сув ва экологик муаммоларни қайд этиб, иқлим ўзгариши хавфи билан боғлиқ вазиятни яхшилаш бўйича тавсиялар берди. Трансчегаравий ҳамкорлик кейинги режалаштиришда муҳим ўрин тутганлиги сабабли, иштирокчилар Ўзбекистон, Қирғизистон ва Тожикистоннинг ушбу йўналишдаги биргаликдаги ҳаракатларини такомиллаштиришнинг самарали механизмларини ишлаб чиқди.
Фарғона водийси дарёларида об-ҳавонинг кескин ўзгариши, хусусан, сел оқимлари кўпайиб бормоқда ва бу таҳдидлар маҳаллий аҳолини эрта огоҳлантириш механизмлари йўқлиги сабабли табиий офатларга олиб келиши мумкин. Бу масала ҳам иштирокчиларнинг муҳокама марказида бўлди. Улар иқлимнинг беқарорлиги хавфини ҳисобга олган ҳолда сув сиёсатини шакллантирдилар ва Фарғона водийси аҳолисини яқинлашиб келаётган табиий офатларни башорат қилиш ва хабардор қилиш имконини берувчи дарёлар ҳавзасини бошқариш режаларини ишлаб чиқди.
Кичик дарёлар ҳавзаларини барқарор бошқариш учун экспертлар ресурс тежовчи технологияларни жорий этиш, табиий офатлардан сўнг каналларни тиклаш, сув ҳисоби тизимини рақамлаштириш зарурлигини таъкидлаб, 2023 йилга мўлжалланган консолидацияланган ҳаракатлар матрицасини тайёрлади.
Тадбир сўнгида жойларда иқлим ўзгаришининг хавф-хатарлари билан яқиндан танишиш мақсадида Подшота дарёси ҳавзасига саёҳат уюштирилди.
Изоҳ (0)