Ўзбекистон мебель ва ёғочни қайта ишлаш саноати ассоциацияси президенти Азиз Нуриддинов бошчилигидаги делегация Польшада ҳар йили ўтказиладиган «Warsaw Home & Contract 2022» халқаро мебелсозлик кўргазмасида иштирок этди, деб хабар бермоқда «Дунё» ахборот агентлиги.
Қайд этилишича, тадбир Марказий—Шарқий Европанинг энг йирик кўргазма марказларидан бири — Польшанинг Надарзин шаҳридаги «Ptak Warsaw Expo» мажмуасида бўлиб ўтган. Унда Европадаги етакчи харидорлар гуруҳлари, шу жумладан, энг йирик мебель дўконлари, улгуржи савдо тармоқлари ва дистрибюторлар, шунингдек, бизнес ва якка мижозлар билан ишлайдиган онлайн-дўконларнинг вакиллари иштирок этган.
Ўзбекистон кўргазмада «MEYOS» уюшмасининг аъзолари — «Ixlos Mebel», «Aiko Rattan», «Chinar FM» ва «Dius Plast» компаниялари ўз маҳсулотлари билан иштирок этган.
Сафар доирасида Ўзбекистон делегацияси Польша, Франция, Словакия, Финляндия, Голландия, Болгария компаниялари – «Paged» (кресло ва столлар ишлаб чиқариш), «Stolarz» (буюртма мебель), «Budostrefa» (девелопер), «Jakub Gardner» (мебель билан жиҳозланган лойиҳаларни бошдан то охиригача амалга оширишга ихтисослашган компания), «Leroy Merliн» (гипермаркетлар қурилиши) ва «Ikea» (гипермаркетлар, уй-рўзғор хўжалик моллари) раҳбарияти билан икки томонлама учрашувлар ўтказган.
Амалий сафар якунлари бўйича Польшанинг «Rudalex» компанияси директори Александр Рудницкий билан «Treet Meble Horeca» бренди остида «MEYOS» ассоциациясининг ваколатхонасини очиш, шунингдек, Познан шаҳрида 2023 йил февраль ойида бўлиб ўтадиган «Meble Polska 2023» халқаро мебель кўргазмасида ўзбек мебелсозлари иштирокини ташкил этиш юзасидан келишувга эришилган.
Изоҳ (0)