Туркия президенти Ражаб Тоййиб Эрдўғон аёлларнинг ҳижоб ўраш ҳуқуқини конституцияда мустаҳкамлаб қўйиш масаласини умумхалқ референдумига қўйишни таклиф қилди. Бу ҳақда у мамлакат жануби-шарқидаги Малатя шаҳрида сўзлаган нутқида маълум қилди.
«Бу ҳақда биринчи марта гапиряпман. Келинг, бу масалани референдумга қўяйлик, халқ қарор қилсин», — деди Эрдўғон асосий мухолифатдаги Жумҳурият Халқ партияси етакчиси Камол Қиличдарўғлининг тегишли қонун лойиҳасини парламентга киритиш ташаббусини изоҳлар экан.
«Биз ҳеч қачон аёлларимизни рўмол ўраган ва ўрамаганларга ажратмаганмиз. Лекин баъзи одамлар ҳалигача бу дискриминацияни онгида сақламоқда. Конституцияга ўзгартириш киритишга тайёргарликни якунладик. Энди ўзгартиришларни парламентга юборамиз», — дея қўшимча қилди Эрдўғон. Аввалроқ у асосий қонунга аёлларнинг ҳижоб кийиш ҳуқуқларини таъминловчи ўзгартиришлар тайёрлашни таклиф қилган эди. Маҳаллий ОАВ хабарларига кўра, Адлия вазирлиги бу ишни аллақачон якунлаган.
Туркияда референдум охирги марта 2017 йилда мамлакатни парламент бошқарувидан президентлик бошқарув шаклига ўтказиш учун конституцияга ўзгартиришлар киритиш масаласи бўйича ўтказилган. Мамлакатда бу бошқарув шакли 2018 йилдан бери амалда. Референдум ўтказиш тўғрисидаги қарор парламент томонидан қабул қилинади, бунинг учун конституциявий кўпчиликнинг овози (600 овоздан 330 та) талаб қилинади.
Эрдўғон аввалроқ Туркияда ҳижобли аёллар учун муаммо йўқлигини айтганди. У раҳбарлик қиладиган исломпараст Адолат ва тараққиёт партияси мамлакатда 20 йилдан буён ҳукмронлик қилмоқда ва давлат муассасаларида мусулмонларга хос кийимларни кийиш амалда қонунийлаштирилган. Аввал буни давлатнинг дунёвий тузилмаси тамойилларининг бузилиши деб ҳисоблаган мухолифатчилар 2023 йил июнига белгиланган умумхалқ сайловлари арафасида «диний эркинликларни қонунчиликда мустаҳкамлаб олиш» ташаббуси билан чиқди.
Изоҳ (0)