Шойгу НАТО мамлакатлари мудофаа вазирларига қўнғироқ қилиб, Украина «ифлос бомба»ни портлатишга тайёрланаётганини билдирди

Россия мудофаа вазири Сергей Шойгу 23 октябрь куни Франция, Туркия, Буюк Британия ва АҚШ мудофаа вазирлари билан телефон орқали боғланди, деб ёзади Meduza. Уларнинг ҳар бири билан Шойгу Украинадаги «назорат қилиб бўлмайдиган даражада кучайиб кетишга мойил бўлган» вазиятни муҳокама қилди.

Франция, Туркия ва Буюк Британия вакиллари билан музокаралар чоғида, Россия Мудофаа вазирлиги хабарига кўра, Шойгу «Украина томонидан ‘ифлос бомба’ қўлланган ҳолда провокациялар амалга оширилиши эҳтимоли юзасидан ўз хавотирини» билдирган. Россия Мудофаа вазирлиги ушбу версияни асословчи ҳеч қандай далилларни тақдим этмаган. Россия идорасининг Пентагон билан музокаралар ҳақидаги хабарида Россия вазири суҳбат чоғида «ифлос бомба» мавзусини кўтарган-кўтармаганига аниқлик киритилмаган.

Музокаралардан аввалроқ Шойгу «РИА Новости»га берган интервьюсида «Киев режими Украинада ‘ифлос бомба’ иштирокида провокация тайёрлаётгани» ҳақида маълум қилган эди. Россия давлат агентлиги «турли мамлакатлардаги, шу жумладан, Украинадаги ишончли манбалар»га таянган. Агентлик даъво қилишича, провокация, гўёки, Россияни оммавий қирғин қуролидан фойдаланишда айблаш ва «шу тариқа дунёда Москвага нисбатан ишончга путур етказишга қаратилган кучли аксилроссия кампаниясини бошлаш» учун тайёрланмоқда. «РИА Новости» хабарига қараганда, «ифлос бомба», гўёки, Украинада яратилмоқда, Киев эса «ядро қуроли таркибий қисмларининг Украинага тақдим этилиши эҳтимоли юзасидан» Буюк Британия билан мулоқот олиб бормоқда. Бошқа мустақил манбалар бу ахборотни тасдиқламаган.

Буюк Британия мудофаа вазири Бен Уоллес Сергей Шойгуни кескин вазиятни янада кучайтириш учун баҳона сифатида бундай баёнотларни қўлламасликка чақирди. Британия Мудофаа вазирлиги икки вазир ўртасида Россия томони ташаббуси билан бўлиб ўтган суҳбат тафсилотларини келтириб ўтди. Иккала вазир ҳам суҳбат чоғида ўзини «профессионал тарзда тутгани ва бир-бирига нисбатан ҳурматни сақлагани»ни қайд этди.

Туркия Мудофаа вазирлиги, ўз навбатида, хабар беришича, суҳбат мобайнида Туркия мудофаа вазири Хулуси Акар Сергей Шойгуга Анқара минтақада барқарорликни қайта тиклашда ёрдам беришга тайёрлигини билдирган. «Томонлар минтақада вазиятни янада чуқурлаштириб юбориши мумкин бўлган эҳтимолий провокациялар қаршисида огоҳликни сақлаш зарурлигини қайд этди», — дейилади Туркия Мудофаа вазирлиги хабарида.

Украина ҳукумати «ифлос бомба» ҳақидаги хабарларни ёлғон деб атади. «Россиянинг Украина, гўёки, ‘ифлос бомба’ қўллашни режалаштираётгани ҳақидаги ёлғони қанчалик кулгили бўлса, шунчалик хавфлидир ҳам», — деди Украина ташқи ишлар вазири Дмитрий Кулеба. Унинг таъкидлашича, Украина Ядро қуроли тарқатмаслик ҳақидаги шартномани қўллаб-қувватлайди. «Бизда ҳеч қанақа ‘ифлос бомбалар’ йўқ ва биз уларга эга бўлишни режалаштирмаяпмиз… Россияликлар кўпинча ўзлари режалаштираётган нарсаларда бошқаларни айблайди», — деди Кулеба.

Украина президенти офиси раҳбари маслаҳатчиси Михаил Подоляк Шойгунинг баёнотини изоҳлар экан, «безбетлик билан ёлғон гапирса, бунга кимдир ишонади, деб ўйлайдиган субъектлар ижросидаги мутлақо ва бутунлай кутилган бемаънилик» эканини айтди.

Украина президенти Владимир Зеленский Украинада «ифлос бомба» фақат Россия томонидан қўлланилиши мумкинлигини маълум қилди.

«Россия ўзи келган ҳамма жойда ўзидан кейин оммавий қабрлар, зиндонлар, вайрон бўлган шаҳар ва қишлоқлар, миналанган ерлар, йўқ қилинган инфратузилма ва табиий офатларни қолдиради. Европанинг бизга тегишли қисмида ядро қуроли қўллаши мумкин бўлган фақат битта субъект бор — ва шу субъектнинг ўзи ўртоқ Шойгуга кимларгадир қўнғироқ қилишни буюрган», — деди Зеленский ўз видеомурожаатида.

Бу Россия томонидан сўнгги вақтларда Украинага қарата айтилаётган биринчи айблов эмас. 18 октябрь куни Россиянинг Украинага истилосига қўмондонлик қилувчи Сергей Суровикин Украина Херсон вилоятининг босиб олинган ҳудудида жойлашган Кахов ГЭС тўғонига ёппасига ракета зарбалари беришни режалаштираётганини айтганди. Америка урушни тадқиқ қилиш институти Россия, катта эҳтимол билан, Кахов ГЭС дамбасига зарар етказиб, ҳодисада Украинани айблашга тайёрланаётганини маълум қилди. Шундан кейин Зеленский, Киев ҳукумати маълумотларига таяниб, Россия ҳарбийлари Кахов ГЭС дамбасини миналаб қўйганини айтди.