Shoygu NATO mamlakatlari mudofaa vazirlariga qo‘ng‘iroq qilib, Ukraina “iflos bomba”ni portlatishga tayyorlanayotganini bildirdi

Rossiya mudofaa vaziri Sergey Shoygu 23-oktabr kuni Fransiya, Turkiya, Buyuk Britaniya va AQSH mudofaa vazirlari bilan telefon orqali bog‘landi, deb yozadi Meduza. Ularning har biri bilan Shoygu Ukrainadagi “nazorat qilib bo‘lmaydigan darajada kuchayib ketishga moyil bo‘lgan” vaziyatni muhokama qildi.

Fransiya, Turkiya va Buyuk Britaniya vakillari bilan muzokaralar chog‘ida, Rossiya Mudofaa vazirligi xabariga ko‘ra, Shoygu “Ukraina tomonidan ‘iflos bomba’ qo‘llangan holda provokatsiyalar amalga oshirilishi ehtimoli yuzasidan o‘z xavotirini” bildirgan. Rossiya Mudofaa vazirligi ushbu versiyani asoslovchi hech qanday dalillarni taqdim etmagan. Rossiya idorasining Pentagon bilan muzokaralar haqidagi xabarida Rossiya vaziri suhbat chog‘ida “iflos bomba” mavzusini ko‘targan-ko‘tarmaganiga aniqlik kiritilmagan.

Muzokaralardan avvalroq Shoygu “RIA Novosti”ga bergan intervyusida “Kiyev rejimi Ukrainada ‘iflos bomba’ ishtirokida provokatsiya tayyorlayotgani” haqida ma’lum qilgan edi. Rossiya davlat agentligi “turli mamlakatlardagi, shu jumladan, Ukrainadagi ishonchli manbalar”ga tayangan. Agentlik da’vo qilishicha, provokatsiya, go‘yoki, Rossiyani ommaviy qirg‘in qurolidan foydalanishda ayblash va “shu tariqa dunyoda Moskvaga nisbatan ishonchga putur yetkazishga qaratilgan kuchli aksilrossiya kampaniyasini boshlash” uchun tayyorlanmoqda. “RIA Novosti” xabariga qaraganda, “iflos bomba”, go‘yoki, Ukrainada yaratilmoqda, Kiyev esa “yadro quroli tarkibiy qismlarining Ukrainaga taqdim etilishi ehtimoli yuzasidan” Buyuk Britaniya bilan muloqot olib bormoqda. Boshqa mustaqil manbalar bu axborotni tasdiqlamagan.

Buyuk Britaniya mudofaa vaziri Ben Uolles Sergey Shoyguni keskin vaziyatni yanada kuchaytirish uchun bahona sifatida bunday bayonotlarni qo‘llamaslikka chaqirdi. Britaniya Mudofaa vazirligi ikki vazir o‘rtasida Rossiya tomoni tashabbusi bilan bo‘lib o‘tgan suhbat tafsilotlarini keltirib o‘tdi. Ikkala vazir ham suhbat chog‘ida o‘zini “professional tarzda tutgani va bir-biriga nisbatan hurmatni saqlagani”ni qayd etdi.

Turkiya Mudofaa vazirligi, o‘z navbatida, xabar berishicha, suhbat mobaynida Turkiya mudofaa vaziri Xulusi Akar Sergey Shoyguga Anqara mintaqada barqarorlikni qayta tiklashda yordam berishga tayyorligini bildirgan. “Tomonlar mintaqada vaziyatni yanada chuqurlashtirib yuborishi mumkin bo‘lgan ehtimoliy provokatsiyalar qarshisida ogohlikni saqlash zarurligini qayd etdi”, — deyiladi Turkiya Mudofaa vazirligi xabarida.

Ukraina hukumati “iflos bomba” haqidagi xabarlarni yolg‘on deb atadi. “Rossiyaning Ukraina, go‘yoki, ‘iflos bomba’ qo‘llashni rejalashtirayotgani haqidagi yolg‘oni qanchalik kulgili bo‘lsa, shunchalik xavflidir ham”, — dedi Ukraina tashqi ishlar vaziri Dmitriy Kuleba. Uning ta’kidlashicha, Ukraina Yadro quroli tarqatmaslik haqidagi shartnomani qo‘llab-quvvatlaydi. “Bizda hech qanaqa ‘iflos bombalar’ yo‘q va biz ularga ega bo‘lishni rejalashtirmayapmiz… Rossiyaliklar ko‘pincha o‘zlari rejalashtirayotgan narsalarda boshqalarni ayblaydi”, — dedi Kuleba.

Ukraina prezidenti ofisi rahbari maslahatchisi Mixail Podolyak Shoyguning bayonotini izohlar ekan, “bezbetlik bilan yolg‘on gapirsa, bunga kimdir ishonadi, deb o‘ylaydigan subyektlar ijrosidagi mutlaqo va butunlay kutilgan bema’nilik” ekanini aytdi.

Ukraina prezidenti Vladimir Zelenskiy Ukrainada “iflos bomba” faqat Rossiya tomonidan qo‘llanilishi mumkinligini ma’lum qildi.

“Rossiya o‘zi kelgan hamma joyda o‘zidan keyin ommaviy qabrlar, zindonlar, vayron bo‘lgan shahar va qishloqlar, minalangan yerlar, yo‘q qilingan infratuzilma va tabiiy ofatlarni qoldiradi. Yevropaning bizga tegishli qismida yadro quroli qo‘llashi mumkin bo‘lgan faqat bitta subyekt bor — va shu subyektning o‘zi o‘rtoq Shoyguga kimlargadir qo‘ng‘iroq qilishni buyurgan”, — dedi Zelenskiy o‘z videomurojaatida.

Bu Rossiya tomonidan so‘nggi vaqtlarda Ukrainaga qarata aytilayotgan birinchi ayblov emas. 18-oktabr kuni Rossiyaning Ukrainaga istilosiga qo‘mondonlik qiluvchi Sergey Surovikin Ukraina Xerson viloyatining bosib olingan hududida joylashgan Kaxov GES to‘g‘oniga yoppasiga raketa zarbalari berishni rejalashtirayotganini aytgandi. Amerika urushni tadqiq qilish instituti Rossiya, katta ehtimol bilan, Kaxov GES dambasiga zarar yetkazib, hodisada Ukrainani ayblashga tayyorlanayotganini ma’lum qildi. Shundan keyin Zelenskiy, Kiyev hukumati ma’lumotlariga tayanib, Rossiya harbiylari Kaxov GES dambasini minalab qo‘yganini aytdi.