Россия президенти Владимир Путин Германия канцлери Олаф Шольц ва Франция етакчиси Эммануэль Макрондан кўра туркиялик ҳамкасби Ражаб Тоййиб Эрдўғон билан тез-тез мулоқот қилишига сабаб Анқаранинг позициясидир, деди Путиннинг матбуот котиби Дмитрий Песков «РБК»га.

«Анқаранинг позицияси Париж ва Берлинникидан фарқ қилади. Анқара воситачилик саъй-ҳаракатларини давом эттиришга тайёрлигини маълум қилмоқда. Президент Путин эса Туркиянинг бу ҳаракатларини бир неча бор олқишлаган», — деди Песков.

Бундан ташқари, Песков Россия Туркия билан «жуда кенг савдо-иқтисодий алоқаларга эга» экани, мамлакатлар турли йирик лойиҳаларни амалга ошираётганини таъкидлади.

«Буларнинг барчаси давлат раҳбарларининг бир-бири билан тез-тез мулоқот қилиши учун сабабдир», — деб тушунтирди Кремль матбуот котиби.

Песковнинг сўзларига кўра, Макрон ва Шольц «сўнгги пайтларда у ёки бу тарзда Россия томонининг позициясига қулоқ солишни», шунингдек, воситачилик ҳаракатларида иштирок этишни истамаган, шунинг учун «улар билан мулоқот кам».

Кремль сайтидаги хабарларга кўра, Украинада уруш бошланганидан бери Путин ва Эрдўғон ўн мартача телефонда гаплашган ва тўрт марта учрашган. Охирги учрашув Осиёда ҳамкорлик ва ишонч чора-тадбирлари бўйича кенгаш саммити доирасида Остонада бўлиб ўтди. Путин Макронга 13 марта, Шольцга эса ўндан ортиқ қўнғироқ қилган. Бироқ Путин Россия босқини бошланганидан бери на Франция президентини, на Германия канцлери билан кўришмаган.