Буюк Британия Мудофаа вазирлиги 24 октябрь куни ўз кундалик ҳисоботини Россия Украинадаги урушда фойдаланаётган Эрон дронларига бағишлади, деб ёзмоқда Meduza.
Ҳисоботда айтилишича, Украина тезлиги унча юқори бўлмаган, шовқинли ва паст баландликда учадиган ушбу камикадзе дронларига қарши курашда тобора муваффақият қозонмоқда, бу эса дронларни одатий ҳаво мудофааси тизимларининг нишонига айлантирмоқда.
Буюк Британия Мудофаа вазирлиги, хусусан, Украина президенти Владимир Зеленскийнинг дронлар ёрдамида қилинган ҳужумларнинг 85 фоизи қайтарилаётгани ҳақидаги баёнотига таянган.
Россия афтидан, Эрон дронларини узоқ масофага учадиган ва юқори аниқликдаги қуроллар ўрнига қўлламоқда, чунки Россиянинг ўзида бундай қуроллар тобора камайиб бормоқда, дейилади Буюк Британия Мудофаа вазирлиги баёнотида.
Британия Мудофаа вазирлигининг ҳисоб-китоблари Украина Мудофаа вазирлиги Бош разведка бошқармаси бошлиғи Кирилл Будановнинг «Украинская правда»га берган интервьюсида дронларни уриб тушириш ҳақида айтган маълумотларидан бироз фарқ қилмоқда. Унга кўра, Россия қўшинлари томонидан учирилган дронларнинг 30 фоизи нишонгача етиб бормоқда.
Буданов, шунингдек, Украина разведкаси маълумотларига кўра, Россия Эрондан 1700 та дрон сотиб олганини айтди. Ҳар бири 300 дона дрондан иборат иккита партия қабул қилиб олинган. Будановнинг сўзларига кўра, ҳозир Россия иккинчи партияни ишлатмоқда.
Украина ва Ғарб мамлакатлари Россия қўшинлари Эрондан сотиб олинган ва Россияда «Геран-2» деб қайта деб номланган Shahed-136 камикадзе дронларидан фойдаланаётганига ишонади. Эрон ва Россия буни расман рад этмоқда. Европа Иттифоқи ва Буюк Британия улардаги маълумотларга кўра, Россия билан келишув тузиш ва рус ҳарбийларини дронлардан фойдаланишга ўқитишда иштирок этган Эрон ҳарбийлари ва дрон ишлаб чиқарувчиларга қарши санкция қўллади.
Изоҳ (0)