Россиянинг Архангельск вилоятидаги «Плесецк» космодромидан иккита ҳарбий сунъий йўлдош ортилган «Союз-2.1в» енгил ташувчи ракетаси учирилди, дея хабар бермоқда «Интерфакс» Россия Мудофаа вазирлигига таяниб.
Космик қурилмаларга «Космос-2561» ва «Космос-2562» тартиб рақамлари берилган.
Аввалроқ, 15 октябрь куни «Плесецк» космодромидан «Ангара-1.2» енгил ракетаси парвоз қилган, ўшанда космик қурилмага «Космос-2560» тартиб рақами берилганди.
Кейинроқ Мудофаа вазирлиги гап ҳарбий сунъий йўлдош ҳақида бораётганини маълум қилди, у муваффақиятли тарзда орбитага чиқарилди. Қурилма билан алоқа ўрнатилди, унинг борт тизимлари тўғри режимда ишлаётгани хабар қилинди.
Эртаси куни эса «Космос-2560» ҳарбий сунъий йўлдоши Россиянинг Фазо маконини назорат қилиш тизими космик объектлари бош каталогига киритилди.
Россия Мудофаа вазирлиги «Плесецк» космодромидан ҳарбий мақсадларда космик қурилмалар ортилган ракеталарни мунтазам равишда учиради. Сўнгги парвозлардан бири апрель охирида амалга оширилган, ўшанда ҳам коинотга «Ангара-1.2» юборилган эди.
Августда космодромдан «Союз-2.1в» ташувчи ракетаси учиб кетган, унга ҳарбий сунъий йўлдош ортилган эди.
Аввалроқ Буюк Британия мудофаа штаби бошлиғи Энтони Радакин Россия космик технологиялар ёрдамида Ғарб мамлакатларига қарши ҳарбий ҳаракатлар олиб бориши мумкинлигини айтганди.
Шу йилнинг июнь ойида Россиянинг Украинадаги жанговар ҳаракатлари фонида «Роскосмос» раҳбари Дмитрий Рогозин бутун космик қурилмалар ресурси Мудофаа вазирлиги манфаатларига жалб этилганини маълум қилганди. Орбитада 160 дан ортиқ ҳарбий ва фуқаролик сунъий йўлдошлари бор, деган эди у.
Ундан аввалроқ Россия Украинадаги ҳарбий ҳаракатларни кузатиб бориш учун мингта сунъий йўлдошни ишга тушириши маълум қилинганди.
Изоҳ (0)