Ўзбекистонда кўчма савдо фаолияти учун талаблар соддалаштирилмоқда. Бу ҳақда «Норма» хабар берди.
Қайд этилишича, Вазирлар Маҳкамасининг «Кўчма савдо фаолиятини янада ривожлантириш мақсадида ер участкаларини ажратишнинг барча учун тенг, шаффоф ва бозор тамойилларига асосланган тартибини жорий этиш муносабати билан Вазирлар Маҳкамасининг «Кўчма савдо фаолиятига замонавий ахборот технологияларини янада кенг жорий этиш ҳамда савдо автомати орқали чакана савдо фаолиятини тартибга солиш чора-тадбирлари тўғрисида» 2021 йил 3 августдаги 485-сон қарорига ўзгартириш ва қўшимчалар киритиш ҳақида»ги қарори қабул қилинди.
Қарорга мувофиқ, эндиликда давлат органлари ва ташкилотларига, шу жумладан, ободонлаштириш ва йўл ташкилотларига, фуқароларнинг ўзини ўзи бошқариш органларига доимий фойдаланиш ҳуқуқи билан ажратилган ҳамда вақтинча фойдаланилмаётган ер участкалари, шунингдек, туман (шаҳар) захирасидаги ер участкалари «К — САВДО» тизими орқали «E-auksion» электрон савдо платформасида кўчма савдо объектини жойлаштириш учун тадбиркорларга электрон онлайн-аукцион орқали 3 йилгача (етиштирилган қишлоқ хўжалиги маҳсулотларини сақлашда фойдаланиладиган енгил конструкцияли кўчма музлатгичлар учун кўпи билан 10 йилгача), шунингдек, мавсумий кафеларни ўрнатиш учун ижарага берилиши мумкин.
Кўчма савдо объектлари тоифасига 100 квадрат метр майдондан кўп бўлмаган лотоклар, палаткалар, савдо аравалари, пештахталар, автодўконлар, автотиркамалар, автотцистерналар, фудтраклар, тонарлар, савдо автоматлари, мобил контейнерлар, енгил конструкциялар, шу каби ва шунга ўхшаш бошқа кўчма савдо объектлари кириши белгиланмоқда.
Шунингдек, илгари кўчма савдо объектларида фақатгина ўтириш жойлари ташкил этмасдан, доналаб сотиладиган таомларни сотиш мумкин бўлган бўлса, эндиликда кичик ошхоналар ташкил этишга рухсат берилди.
Кўчма савдо объектларида қуйидаги фаолиятга рухсат берилмоқда:
- етиштирилган қишлоқ хўжалиги маҳсулотларини енгил конструкцияли кўчма музлатгичларда сақлаш ва сотиш;
- енгил турдаги транспорт воситаларини (енгил автомобиль, велосипед, самокат, скутер ва бошқалар) ижарага бериш ва таъмирлаш хизматлари;
- электромобилларни зарядлаш;
- сартарошлик хизматлари;
- косметолог хизматлари;
- пойабзал таъмирлаш хизмати;
- маиший техника воситаларини таъмирлаш хизмати;
- калит ясаш хизмати.
- маъмурий биноларда;
- жамоат транспорти бекатларида;
- пиёдалар ўтиш жойларидан олдин 15 метрдан кам масофада.
Умумий овқатланиш ташкилотига туташ ёки 5 метрдан ошмайдиган масофада жойлашган, бўш турган кўчма савдо жойи электрон онлайн-аукционсиз умумий овқатланиш ёки савдо соҳасида қўшимча хизмат кўрсатиш учун ижарага берилиши мумкин.
Ҳоким ёрдамчилари, жисмоний ва юридик шахслар кўчма савдо жойини «К — САВДО» тизимига киритиш ҳуқуқига эга. Бунда ғолиб деб топилган жисмоний шахс 5 иш куни ичида тадбиркорлик субъекти сифатида давлат рўйхатидан ўтиши шарт.
Изоҳ (0)