Термиз шаҳрининг собиқ ҳокими ва унинг ўринбосарлари ҳибсга олинди. Бу ҳақда «Gazeta.uz» нашри хабар берди.
Маълум қилинишича, собиқ ҳоким Исроил Худойбердиев, ҳокимнинг собиқ биринчи ўринбосари Ғайрат Эламанов, ҳокимнинг қурилиш бўйича собиқ ўринбосари Шуҳрат Раҳмонқулов, шаҳар архитектори, «Яшил дунё» савдо мажмуаси лойиҳачиси, раҳбари ва қурувчиси ҳибсга олинган. Улар «Яшил дунё» савдо мажмуаси қурилиши давомида 14,8 млрд сўмни ўзлаштирганликда гумонланмоқда.
Бу хабарни нашрга тасдиқлаган ҳокимнинг адвокати, шаҳар ҳокимлиги расмийлари, қолаверса, вилоят прокуратураси матбуот котиби Алишер Бобомурадов тергов сири бўлганлиги сабабли ҳозирча гумондорлар қайси моддалар асосида ҳибсга олинганини очиқламаган. Бироқ ҳокимликка яқин манбаларнинг «Gazeta.uz» мухбирига маълум қилишича, Исроил Худойбердиевга Жиноят кодексининг 207-моддаси (мансабга совуққонлик билан қараш) ҳамда 209-моддаси (мансаб сохтакорлиги) билан жиноят иши қўзғатилган.
Шаҳар ҳокимининг биринчи ўринбосари Ғайрат Эламановга нисбатан эса Жиноят кодексининг 167-моддасининг «а» банди (ўзлаштириш ёки растрата йўли билан талон-торож қилиш) бўйича айблов эълон қилинган. Собиқ ҳоким қамоққа олинганидан бир неча кун ўтгач, у ҳам эҳтиёт чораси сифатида ҳибсга олинган.
Бундан ташқари, 2017—2018 йилларда ҳокимнинг қурилиш бўйича ўринбосари сифатида ишлаган Шуҳрат Раҳмонқулов ҳам қамоққа олинган ва жиноят ишига жалб қилинган.
Собиқ ҳоким Исроил Худойбердиевнинг адвокати ўзлаштирилгани айтилаётган пуллар шаҳардаги кўплаб камчиликларни бартараф этишга сарфланганини таъкидлаган. Бунга аниқлик киритишга уринаётган ҳуқуқ-тартибот ходимлари шаҳар ҳокимлигининг бошқа мансабдор шахслари ҳамда «Яшил дунё» мажмуасида савдо дўконлари мавжуд тадбиркорлар ҳам жиноят иш бўйича олиб борилаётган тергов доирасида сўроққа чақирмоқда.
Тергов ҳаракатлари Бош прокуратуранинг Уюшган жиноятчилик ва коррупцияга қарши курашиш бошқармаси томонидан олиб борилмоқда.
«Gazeta.uz» ҳукуматдаги манбаларига таяниб, Сурхондарёдаги кенг турдаги текширувлар вилоят ҳокими Тўра Боболовнинг аудиолари тарқалиши ва уни президент танқид қилиши ортидан ўтказилаётган ўрганишлар натижасида содир бўлаётганини айтмоқда.
Президент админстрацияси раҳбари Сардор Умурзоқов 2022 йилнинг 27 сентябрь куни Сурхондарё вилояти ҳокими Тўра Боболов иш ҳақининг 40 фоизи миқдорида жаримага тортилганини маълум қилиб, президентнинг давлат хизмати ва ҳокимият вакиллик органлари билан ҳамкорлик қилиш масалалари бўйича маслаҳатчиси Қаҳрамон Қуронбоевга махсус ишчи гуруҳ тузиб, унга шахсан раҳбарлик қилишини айтганди.
Изоҳ (0)