Termiz shahrining sobiq hokimi va uning o‘rinbosarlari hibsga olindi. Bu haqda “Gazeta.uz” nashri xabar berdi.
Ma’lum qilinishicha, sobiq hokim Isroil Xudoyberdiyev, hokimning sobiq birinchi o‘rinbosari G‘ayrat Elamanov, hokimning qurilish bo‘yicha sobiq o‘rinbosari Shuhrat Rahmonqulov, shahar arxitektori, “Yashil dunyo” savdo majmuasi loyihachisi, rahbari va quruvchisi hibsga olingan. Ular “Yashil dunyo” savdo majmuasi qurilishi davomida 14,8 mlrd so‘mni o‘zlashtirganlikda gumonlanmoqda.
Bu xabarni nashrga tasdiqlagan hokimning advokati, shahar hokimligi rasmiylari, qolaversa, viloyat prokuraturasi matbuot kotibi Alisher Bobomuradov tergov siri bo‘lganligi sababli hozircha gumondorlar qaysi moddalar asosida hibsga olinganini ochiqlamagan. Biroq hokimlikka yaqin manbalarning “Gazeta.uz” muxbiriga ma’lum qilishicha, Isroil Xudoyberdiyevga Jinoyat kodeksining 207-moddasi (mansabga sovuqqonlik bilan qarash) hamda 209-moddasi (mansab soxtakorligi) bilan jinoyat ishi qo‘zg‘atilgan.
Shahar hokimining birinchi o‘rinbosari G‘ayrat Elamanovga nisbatan esa Jinoyat kodeksining 167-moddasining “a” bandi (o‘zlashtirish yoki rastrata yo‘li bilan talon-toroj qilish) bo‘yicha ayblov e’lon qilingan. Sobiq hokim qamoqqa olinganidan bir necha kun o‘tgach, u ham ehtiyot chorasi sifatida hibsga olingan.
Bundan tashqari, 2017—2018-yillarda hokimning qurilish bo‘yicha o‘rinbosari sifatida ishlagan Shuhrat Rahmonqulov ham qamoqqa olingan va jinoyat ishiga jalb qilingan.
Sobiq hokim Isroil Xudoyberdiyevning advokati o‘zlashtirilgani aytilayotgan pullar shahardagi ko‘plab kamchiliklarni bartaraf etishga sarflanganini ta’kidlagan. Bunga aniqlik kiritishga urinayotgan huquq-tartibot xodimlari shahar hokimligining boshqa mansabdor shaxslari hamda “Yashil dunyo” majmuasida savdo do‘konlari mavjud tadbirkorlar ham jinoyat ish bo‘yicha olib borilayotgan tergov doirasida so‘roqqa chaqirmoqda.
Tergov harakatlari Bosh prokuraturaning Uyushgan jinoyatchilik va korrupsiyaga qarshi kurashish boshqarmasi tomonidan olib borilmoqda.
“Gazeta.uz” hukumatdagi manbalariga tayanib, Surxondaryodagi keng turdagi tekshiruvlar viloyat hokimi To‘ra Bobolovning audiolari tarqalishi va uni prezident tanqid qilishi ortidan o‘tkazilayotgan o‘rganishlar natijasida sodir bo‘layotganini aytmoqda.
Prezident adminstratsiyasi rahbari Sardor Umurzoqov 2022-yilning 27-sentabr kuni Surxondaryo viloyati hokimi To‘ra Bobolov ish haqining 40 foizi miqdorida jarimaga tortilganini ma’lum qilib, prezidentning davlat xizmati va hokimiyat vakillik organlari bilan hamkorlik qilish masalalari bo‘yicha maslahatchisi Qahramon Quronboyevga maxsus ishchi guruh tuzib, unga shaxsan rahbarlik qilishini aytgandi.
Izoh (0)