Украина инфратузилмасига Россия қўшинларининг оммавий зарбаларидан сўнг, Қўшма Штатлар уни тиклаш учун ишчи гуруҳ тузди. Бу ҳақда АҚШ Савдо вазирлиги хабар бермоқда.
Хабарда айтилишича, АҚШнинг икки – савдо ва транспорт вазирликлари, шунингдек, Украина инфратузилма вазирлиги «Украинанинг уруш давридаги муҳим эҳтиёжларига ва урушдан кейин инфратузилмани реконструкция қилишга йўналтирилган» ишчи гуруҳ тузди.
Гуруҳ ўзининг биринчи йиғилишини келгуси ойларда ўтказишни режалаштирмоқда, унда хусусан, энергия масалаларига эътибор қаратилади.
Бундан ташқари, Украинани қайта тиклашда АҚШ хусусий секторининг иштироки, Америка ва Украинанинг энг яхши инновацияларини жорий этиш масалалари муҳокама қилинади.
Россия 9 октябрь куни Қрим кўпригида рўй берган портлашдан сўнг Украинадаги энергетика объектларига мунтазам равишда ҳужум қила бошлади. Россия расмийлари портлашни уюштиришда Украина разведка хизматларини айблади.
18 октябрь куни Украина президенти Владимир Зеленский Украина электр станцияларининг учдан бир қисми Россия зарбаларига учраганини айтди. 19 октябрь куни, унинг сўзларига кўра, яна учта энергетика объектига ҳужум қилинган.
Изоҳ (0)